ടിക്കറ്റ് നിരക്കുകള്‍ കുറച്ച് വിവിധ വിമാനകമ്പനികൾ

ദുബായ്: വിമാന ടിക്കറ്റുകളിൽ വൻ ഇളവ്. യു.എ.ഇ.യിൽനിന്നുള്ള പ്രവാസി യാത്രക്കാർക്കാണ് ഈ സുവർണ അവസരം വിമാനകമ്പനികൾ നൽകിയിരിക്കുന്നത്. എയർ അറേബ്യ, എമിറേറ്റസ്, ഫ്ളൈ ദുബായ് തുടങ്ങിയ വിമാനക്കമ്പനികളാണ് നിശ്ചിത സമയത്തിനുള്ളിൽ വിലകുറഞ്ഞ ടിക്കറ്റ് നിരക്കുകൾ പ്രഖ്യാപിച്ചത്.

എയർ അറേബ്യയിൽ കേവലം 169 ദിർഹത്തിന് ഷാർജയിൽ നിന്ന് കേരളത്തിലെ ഉൾപ്പെടെയുള്ള വിമാനത്താവളത്തിലേക്ക് പറക്കാം. കോഴിക്കോട്, കൊച്ചി, തിരുവനന്തപുരം എന്നിവിടങ്ങളിലേക്കാണ് ഈ നിരക്കുള്ളത്. ഒരു വശത്തേക്കുള്ള ടിക്കറ്റാണ് ഈ തുകയ്ക്ക് ലഭിക്കുക.

സെപ്റ്റംബർ 22 വരെ മാത്രമേ ഈ പ്രത്യേക ഓഫർ ലഭ്യമാകൂ. 2019 മാർച്ച് 31 വരെയുള്ള യാത്രകൾ ഈ നിരക്കിൽ ബുക്ക് ചെയ്യാൻ സാധിക്കും. സർചാർജ്, എയർപോർട്ട് ടാക്സ് ഉൾപ്പെടെയാണ് ഈ ഓഫറെന്ന് വിമാനക്കമ്പനി വെബ്സൈറ്റിൽ വ്യക്തമാക്കി.