കൊല്ലം: പോസ്റ്റോഫീസ് വഴി എത്തിച്ച കഞ്ചാവ് പിടികൂടി. കൊല്ലം മൈത്രി നഗർ സ്വദേശി റിജി ജേക്കബിന്റെ പേരിലാണ് പോസ്റ്റ് ഓഫീസിൽ പാഴ്സൽ വഴി കഞ്ചാവ് എത്തിയത്. സംഭവവുമായി ബന്ധപ്പെട്ട് റിജി ജേക്കബിനെ എക്സൈസ് കസ്റ്റഡിയിലെടുത്തു.
കൊല്ലം പട്ടത്താനത്തെ പോസ്റ്റോഫീസിലാണ് കഞ്ചാവ് പാഴ്സൽ എത്തിയത്. രാവിലെ എത്തിയ പാഴ്സലുകൾ തരംതിരിക്കുമ്പോഴാണ് ജീവനക്കാർക്ക് സംശയം തോന്നിയത്. പൊട്ടിയ നിലയിലായിരുന്നു കവറിൽ, തേയില തരി പോലെ കണ്ടപ്പോൾ സംശയം തോന്നി പരിശോധിച്ചപ്പോഴാണ് കഞ്ചാവാണെന്ന് മനസിലായതെന്ന് പോസ്റ്റ് മാസ്റ്റർ അജുലാൽ പറഞ്ഞു.
തുടർന്ന്, ഉടൻ തന്നെ എക്സൈസ് സംഘത്തെ വിവരമറിയിക്കുകയായിരുന്നു. 220 ഗ്രാം തൂക്കമുള്ള കഞ്ചാവ് ഇൻഡോറിൽ നിന്നുമാണ് എത്തിയത്. പോസ്റ്റോഫീസ് വഴി ആദ്യമായിട്ടാണ് ഇങ്ങനെ കഞ്ചാവ് എത്തുന്നതെന്നും ഇതിനെക്കുറിച്ച് വിശദമായി അന്വേഷണം നടത്തുമെന്നും എക്സൈസ് സർക്കിൾ ഇൻസ്പെക്ടർ കൃഷ്ണകുമാർ പറഞ്ഞു. കസ്റ്റഡിയിലെടുത്ത റിജി ജേക്കബിനെ കൂടുതൽ വിവരങ്ങൾക്കായി ചോദ്യം ചെയ്ത് വരികയാണ്.
Post Your Comments