പന്തളം: ഫേസ്ബുക്കിലൂടെ പരിചയപ്പെട്ട യുവാവിന് വിവാഹ വാഗ്ദാനം നൽകി 11 ലക്ഷം രൂപ തട്ടിയ കേസിൽ യുവതിയും ഭര്‍ത്താവും അറസ്റ്റില്‍. കൊട്ടാരക്കര പുത്തൂര്‍ പവിത്രേശ്വരം എസ്.എന്‍ പുരം ബാബുവിലാസത്തില്‍ താമസിക്കുന്ന കാര്‍ത്തികപ്പള്ളി മുതുകുളം പുളിയറ പാര്‍വതി ടി. പിള്ള (31), ഭര്‍ത്താവ് സുനില്‍ലാല്‍ (43) എന്നിവരെയാണ് പന്തളം പൊലീസ് പിടികൂടിയത്.
Also Read:യാത്രക്കാർക്ക് സൗജന്യ ‘എക്സ്പോ 2020’ പ്രവേശന ടിക്കറ്റുമായി ഇത്തിഹാദ് എയർവേയ്സ്
അവിവാഹിതയായ താന്‍ പുത്തൂര്‍ പാങ്ങോട് സ്വകാര്യ സ്‌കൂളില്‍ അധ്യാപികയാണെന്നും സുനില്‍ലാൽ എന്നയാളുടെ വീട്ടില്‍ പേയിങ് ഗെസ്റ്റായി താമസിക്കുകയാണെന്നുമായിരുന്നു പരാതിക്കാരനായ മഹേഷിനെ പാര്‍വതി വിശ്വസിപ്പിച്ചിരുന്നത്. തുടർന്ന് മഹേഷിന് വിവാഹ വാഗ്ദാനം നല്‍കി, തനിക്ക് 10 വയസ്സുള്ളപ്പോള്‍ തന്റെ മാതാപിതാക്കള്‍ മരിച്ചെന്നും അതിന്റെ കേസ് നടക്കുകയാണെന്നും വിശ്വസിപ്പിച്ചു.
കേസ് നടത്താൻ എന്ന വ്യാജേനയാണ് പാർവതി പണം കൂടുതലും വാങ്ങിയെടുത്തത്. ചികിത്സയുടെ പേരിലും പണം വാങ്ങിയെന്ന് മഹേഷ് പറയുന്നു. തുടർന്ന് വിവാഹത്തിന്റെ കാര്യം പറഞ്ഞപ്പോള്‍ ഒഴിഞ്ഞുമാറിയതോടെയാണ് മഹേഷ് ഇവരുടെ വീട്ടില്‍ ചെന്നത്. അതോടെയാണ് യുവതി തന്നെ കബളിപ്പിക്കുകയായിരുന്നെന്ന് മഹേഷിന് മനസ്സിലായത്. തുടര്‍ന്ന് പന്തളം പൊലീസില്‍ പരാതി നല്‍കുകയായിരുന്നു. സമാനമായ രീതിയിൽ യുവതി നിരവധി ആളുകളെ കുടുക്കിയിട്ടുണ്ടാകാമെന്നാണ് പോലീസ് സംശയിക്കുന്നത്.
Post Your Comments