തൃശൂര്‍: 7 മാസത്തിനിടെ തൃശൂര്‍ സ്വദേശിക്ക് കോവിഡ് ബാധിച്ചത് 3 തവണ. പൊന്നൂക്കര സ്വദേശി പാലവേലി വീട്ടില്‍ സാവിയോ ജോസഫ് ആണ് തനിക്ക് 7 മാസത്തിനിടെ മൂന്ന് തവണ കോവിഡ് ബാധിച്ചതായി അവകാശപ്പെടുന്നത്. യുവാവ് പറയുന്ന വിവരങ്ങള്‍ ശരിയായാല്‍ 3 തവണ കോവിഡ് ബാധിച്ച രാജ്യത്തെ ആദ്യത്തെ വ്യക്തിയാകും സാവിയോ.
സാവിയോ പറയുന്നതിങ്ങനെ:
മാർച്ചിൽ മസ്കത്തിലെ ജോലി സ്ഥലത്തു കോവിഡ് സ്ഥിരീകരിച്ചു.സുഖപ്പെട്ടു നാട്ടിലെത്തിയശേഷം ജൂലൈയിൽ വീണ്ടും രോഗലക്ഷണങ്ങൾ കണ്ടു. തൃശൂരിൽ നടത്തിയ പരിശോധനയിൽ പോസിറ്റീവാണെന്നു സ്ഥിരീകരിച്ചു. മെഡിക്കൽ കോളജിലെ ചികിത്സയ്ക്കു ശേഷം വീണ്ടും നെഗറ്റീവായെങ്കിലും 2 മാസം കഴിഞ്ഞപ്പോൾ വീണ്ടും പോസിറ്റീവായി.
അതേസമയം, മൂന്ന് തവണ കോവിഡ് ബാധിതനായ യുവാവിനെക്കുറിച്ച് പഠനം നടത്താന്‍ ഐസിഎംആര്‍ രംഗത്തുവന്നിരിക്കുകയാണ്. കൂടുതല്‍ പഠനത്തിനായി സാവിയോ ജോസഫിന്റെ രക്ത, സ്രവ സാംപിളുകളും മുൻ പരിശോധനാ വിവരങ്ങളും ശേഖരിച്ചു.
Post Your Comments