വയനാട്: പുല്‍പ്പള്ളിയില്‍ വനത്തിലേക്ക് പോയതിനെ തുടര്‍ന്ന് വൈകിട്ട് മുതല്‍ കാണാതായ ആദിവാസി യുവാവിന്റെ മൃതദേഹം ഉള്‍വനത്തില്‍ നിന്ന് കണ്ടെത്തി. ബസവന്‍കൊല്ലി കോളനിയിലെ ശിവകുമാറിന്റെ (24) മൃതദേഹമാണ് ചെതലയം റെയ്ഞ്ചിലെ കല്ലുവയല്‍ വനത്തിനുള്ളില്‍ കണ്ടെത്തിയത്. മുളങ്കൂമ്പ് ശേഖരിക്കാന്‍ വനത്തിലേക്ക് പോയപ്പോള്‍ കടുവ ആക്രമിച്ചതെന്നാണ് പ്രാഥമിക നിഗമനം. തലയും കാലുകളും ഒഴികെയുള്ള മറ്റു ശരീരഭാഗങ്ങളെല്ലാം പൂര്‍ണമായും തിന്നുതീര്‍ത്ത നിലയിലാണ്.
ഇന്നലെ മുതല്‍ പൊലീസ് ഉദ്യോഗസ്ഥരും, നാട്ടുകാരും ശിവകുമാറിനായി തിരച്ചില്‍ നടത്തിയെങ്കിലും ഇന്നാണ് മൃതദേഹം കണ്ടെത്തിയത്. ഇന്നലെ മുതല്‍ കാണാതായിട്ടും യുവാവിനായി തിരച്ചില്‍ നടത്താന്‍ താമസിച്ചു എന്ന് ആദിവാസി പ്രവര്‍ത്തകര്‍ ആരോപിക്കുന്നുണ്ട്. സ്ഥലത്ത് സംഘര്‍ഷാവസ്ഥ നിലനില്‍ക്കുന്നതിനാല്‍ പ്രദേശത്ത് കൂടുതല്‍ പൊലീസെത്തിയിട്ടുണ്ട്.
Post Your Comments