ആറാമത്തെ വിരലുകള്‍ അമ്മ മുറിച്ചു; നവജാത ശിശുവിന് ദാരുണാന്ത്യം

ഖണ്ട്വ: കൈകാലുകളില്‍ ആറു വിരലുമായി ജനിച്ച പെണ്‍കുഞ്ഞിന്റെ ആറാമത്തെ വിരലുകള്‍ അമ്മ മുറിച്ചുമാറ്റി. രക്തസ്രാവത്തെ തുടര്‍ന്ന് കുട്ടി മണിക്കൂറുകള്‍ക്കുള്ളില്‍ മരിച്ചു. മധ്യപ്രദേശിലെ ഗോത്രഗ്രാമത്തിലാണ് സംഭവം. കുട്ടി വിവാഹിതയാകുന്നതിന് അധികവിരലുകള്‍ തടസ്സമാകുമെന്ന് ഭയന്നാണ് അമ്മ ഇങ്ങനെ ചെയ്തെന്നാണ് പൊലീസ് ഭാഷ്യം. സുന്ദര്‍ദേവ് ഗ്രാമത്തില്‍ താരാഭായ് എന്ന സ്ത്രീയാണ് കുഞ്ഞിന്റെ നാലു വിരലുകള്‍ മുറിച്ചു മാറ്റിയത്. മുറിച്ചു മാറ്റിയിടത്ത് ചാണകം തേച്ചു. തുടര്‍ന്നുണ്ടായ രക്തസ്രാവത്തെ തുടര്‍ന്നാണ് കുഞ്ഞ് മരിച്ചത്. കുഞ്ഞിന്റെ മൃതദേഹം ഇവര്‍ കുഴിച്ചിടുകും ചെയ്തു. സംഭവം വാര്‍ത്തയായതോടെ പരിശോധനയ്ക്കായി മൃതദേഹം പുറത്തെടുത്തിട്ടുണ്ടെന്ന് ഔദ്യോഗിക വൃത്തങ്ങള്‍ അറിയിച്ചു. പോസ്റ്റുമോര്‍ട്ടം നടത്തിയെന്നും ഫലം വന്നശേഷം അടുത്ത നടപടിയിലേക്കു കടക്കുമെന്നും എസ്.പി. രുചിവര്‍ധന്‍ മിശ്ര അറിയിച്ചു.