ഭോപ്പാല്‍: സ്റ്റേഷനിലെത്തിച്ച പ്രതി പോലീസുകാരനെ പിക്കാസ് കൊണ്ടടിച്ചു കൊന്നു. മറ്റൊരു പോലീസുദ്യോഗസ്ഥന്‍ ഗുരുതരാവസ്ഥയില്‍ ചികിത്സയിലാണ്. മധ്യപ്രദേശിലെ ഭിണ്ഡ് ജില്ലയിലാണ് സംഭവം നടന്നത്. സ്റ്റേഷനിലെ സിസിടിവിയില്‍ പ്രതിയായ വിഷ്ണു രാജ്‌വത്ത് പൊലീസുകാരനെ ആക്രമിക്കുന്നത് ദൃശ്യങ്ങളില്‍ വ്യക്തമാണ്. ഞായറാഴ്ചയായിരുന്നു സംഭവം. സ്ഥലത്തെ അങ്ങാടിയില്‍ പ്രശ്നങ്ങളുണ്ടാക്കുന്നെന്ന പരാതിയെ തുടര്‍ന്നാണ് വിഷ്ണുവിനെ കസ്റ്റഡിയിലെടുത്തത്.
സുഹൃത്ത് കാണാനെത്തിയതിനെ തുടര്‍ന്ന് പുറത്തിറങ്ങിയ വിഷ്ണു പിക്കാസ് കൊണ്ട് പൊലീസുകാരെ ആക്രമിക്കുകയായിരുന്നു. ആദ്യം തലയ്ക്കടിയേറ്റ പൊലീസുദ്യോഗസ്ഥന്‍ ബോധരഹിതനായി വീഴുന്നതും തുടര്‍ന്ന് അടുത്തിരുന്ന മറ്റൊരുദ്യോഗസ്ഥനെ ആക്രമിക്കുന്നതും ദൃശ്യങ്ങളിലുണ്ട്. രണ്ടുദ്യോഗസ്ഥരേയും അടുത്തുള്ള ആശുപത്രിയില്‍ എത്തിച്ചിരുന്നെങ്കിലും ഹെഡ് കോണ്‍സ്റ്റബിള്‍ ഉമേഷ് ബാബുവിന്റെ ജീവന്‍ രക്ഷിക്കാനായില്ല. വിഷ്ണുവിനേയും സുഹൃത്തിനേയും പിന്നീട് പൊലീസ് അറസ്റ്റ് ചെയ്തു.
Post Your Comments