പകൽ സമയത്ത് ജോലിക്ക് പോവില്ല, രാത്രി ബിഗ് ഷോപ്പറുമായി ഇറങ്ങും: അന്വേഷണത്തിന്‌ ഒടുവില്‍ കണ്ടെത്തിയത്‌ 

പാലക്കാട്: പാലക്കാട്‌ ചാലിശ്ശേരിയിൽ അടയ്ക്ക മോഷ്ടാവ് ഒടുവില്‍ പിടിയിൽ. അസം സ്വദേശി മുസമ്മിൽ ഹഖിനെ ആണ് ചാലിശ്ശേരി പൊലീസ് പിടികൂടിയത്.

ചാലിശ്ശേരിയിലെ വീടുകളിൽ രാത്രി ഉണാക്കനിട്ട അടയ്ക്കകൾ നേരം വെളുക്കുമ്പോൾ കാണാതെ ആവുക പതിവായിരുന്നു. ഇത് സംബന്ധിച്ച പരാതിയും വ്യാപകമായത്തോടെ പൊലീസ് നടത്തിയ അന്വേഷണത്തിലാണ് പ്രതി കുടുങ്ങിയത്.

അസമില്‍ നിന്നും ആറു വർഷം മുൻപ് ആണ് ഇയാൾ കേരളത്തിലെത്തിയത്. പകൽ സമയത്ത് ജോലിക്ക് പോകാതെ അലഞ്ഞു തിരിയുകയാണ് മുസമ്മിലിന്റെ രീതി. രാത്രി ബിഗ് ഷോപ്പറുമായി വീടുകളിൽ കയറിയിറങ്ങി ഉണക്കാനിട്ട അടക്കകൾ മുഴുവൻ കവർന്നെടുക്കും.

പ്രതിയുടെ പെരുമ്പിലാവിലെ താമസ സ്ഥലത്ത് നിന്നും രണ്ട് ബിഗ് ഷോപ്പറുകളിൽ സൂക്ഷിച്ച അടയ്ക്കകൾ പൊലീസ് കണ്ടെടുത്തു. കോടതിയിലെ ഹാജരാക്കിയ പ്രതിയെ റിമാൻഡ് ചെയ്തു.