ചന്ദ്രയാൻ-3 വിജയകരമായി ചന്ദ്രനിലിറങ്ങിയതിനെ തുടർന്ന് ഇന്ത്യൻ ബഹിരാകാശ ഗവേഷണ സ്ഥാപനത്തിന്റെ (ഐഎസ്ആർഒ) തലവൻ എസ് സോമനാഥ് തിരുവനന്തപുരത്ത് സ്ഥിതി ചെയ്യുന്ന പൗർണമിക്കാവ് ഭദ്രകാളി ക്ഷേത്രം സന്ദർശിച്ചിരുന്നു. ശാസ്ത്രവും ആത്മീയതയും രണ്ട് വ്യത്യസ്ത മേഖലകളാണെന്നും അവയെ കൂട്ടിയിണക്കേണ്ടതില്ലെന്നും അദ്ദേഹം ക്ഷേത്ര ദർശനത്തിന് ശേഷം മാധ്യമപ്രവർത്തകരോട് പറഞ്ഞിരുന്നു. ഇപ്പോഴിതാ, ആത്മീയത തന്റെ ജീവിത യാത്രയുടെ ഭാഗമാണെന്ന് വ്യക്തമാക്കുകയാണ് അദ്ദേഹം. വാർത്താ ഏജൻസിയായ എഎൻഐയോട് ആയിരുന്നു അദ്ദേഹത്തിന്റെ പ്രതികരണം.
‘ഞാൻ ഒരു പര്യവേക്ഷകനാണ്, ഞാൻ ചന്ദ്രനെ പര്യവേക്ഷണം ചെയ്യുന്നു. ഞാൻ ആന്തരിക ബഹിരാകാശത്തെ പര്യവേക്ഷണം ചെയ്യുന്നു. അതിനാൽ ശാസ്ത്രവും ആത്മീയതയും പര്യവേക്ഷണം ചെയ്യുക എന്നത് എന്റെ ജീവിത യാത്രയുടെ ഭാഗമാണ്. അതിനാൽ ഞാൻ നിരവധി ക്ഷേത്രങ്ങൾ സന്ദർശിക്കുകയും നിരവധി ഗ്രന്ഥങ്ങൾ വായിക്കുകയും ചെയ്യുന്നു. ഈ പ്രപഞ്ചത്തിലെ നമ്മുടെ അസ്തിത്വത്തിന്റെയും നമ്മുടെ യാത്രയുടെയും അർത്ഥം കണ്ടെത്താൻ ഞാൻ ശ്രമിക്കുന്നു. ഞാൻ ക്ഷേത്രങ്ങളിൽ വരാറുണ്ട്’, അദ്ദേഹം പറഞ്ഞു.
ചന്ദ്രയാൻ -3 ന്റെ ലാൻഡിംഗ് സൈറ്റിനായി തിരഞ്ഞെടുത്ത ‘ശിവശക്തി’ എന്ന പേര് പ്രതിപക്ഷം ചോദ്യം ചെയ്തതിലും അദ്ദേഹം പ്രതികരിച്ചു. പേരിന്റെ പ്രാധാന്യത്തെക്കുറിച്ചുള്ള പ്രധാനമന്ത്രി മോദിയുടെ വിശദീകരണം എല്ലാവരിലും പ്രതിധ്വനിക്കുന്നുണ്ടെന്ന് അദ്ദേഹം അഭിപ്രായപ്പെട്ടു. നമുക്കെല്ലാവർക്കും ചേരുന്ന രീതിയിലാണ് പ്രധാനമന്ത്രി അതിന്റെ അർത്ഥം വിവരിച്ചത്. അതിൽ തെറ്റൊന്നുമില്ലെന്ന് ഞാൻ കരുതുന്നു. എന്ത് പേരിടണം എന്ന കാര്യത്തിൽ രാജ്യത്തിന്റെ പ്രധാനമന്ത്രി സ്ഥാനത്തിരിക്കുന്ന അദ്ദേഹത്തിന് അവകാശമുണ്ടെന്നും സോമനാഥ് പറഞ്ഞു.
Post Your Comments