ശിവശക്തി പോയിന്‍റിൽ നിന്ന് സിഗ്നൽ ലഭിക്കുമോ? വിക്രം ലാൻഡറും പ്രഗ്യാൻ റോവറും ഉണർന്നില്ലെങ്കിൽ സംഭവിക്കുന്നതെന്ത്?

ബെം​ഗളൂരു: ഇന്ത്യയുടെ അഭിമാന ചാന്ദ്ര പര്യവേഷണ ദൗത്യമായ ചന്ദ്രയാൻ മൂന്ന് പേടകത്തെ സ്ലീപ് മോഡിൽ നിന്ന് ഉണർത്താനുള്ള തീവ്ര ശ്രമത്തിലാണ് ഐ.എസ്.ആർ.ഒ. ചന്ദ്രന്‍റെ ദക്ഷിണധ്രുവത്തില്‍ സൂര്യനുദിച്ചതോടെ ചന്ദ്രയാന്‍-മൂന്ന് ദൗത്യത്തിലെ വിക്രം ലാന്‍ഡറിനെയും പ്രഗ്യാന്‍ റോവറെയും ഉണർത്തുന്നതിനായുള്ള ശ്രമം ഊർജ്ജിതമാക്കിയിരിക്കുകയാണെന്ന് ഐ.എസ്.ആർ.ഒ അറിയിച്ചു. ബന്ധം സ്ഥാപിക്കാനുള്ള ശ്രമങ്ങൾ തുടരുമെന്നും ബഹിരാകാശ ഏജൻസി കൂട്ടിച്ചേർത്തു. ചന്ദ്രനിൽ സൂര്യാസ്തമയത്തിന് 240 മണിക്കൂറിലേറെ സമയമുള്ളതിനാൽ പേടകത്തെ ഉണർത്താൻ കഴിയും എന്നാണ് കണക്കുകൂട്ടൽ.

ഉറക്കത്തില്‍നിന്ന് ഉണര്‍ന്ന് പ്രവര്‍ത്തന ക്ഷമമായോ എന്നറിയാനുള്ള പ്രവര്‍ത്തനങ്ങള്‍ ഇനിയും തുടരുമെന്നും ഐഎസ്ആര്‍ഒ അറിയിച്ചു. ഇപ്പോള്‍ സിഗ്നല്‍ ലഭിച്ചില്ലെങ്കിലും അധികം വൈകാതെ ശുഭവാര്‍ത്തയുണ്ടാകുമെന്ന പ്രതീക്ഷയിലാണ് ശാസ്ത്ര ലോകം. റോവർ പുനരുജ്ജീവിപ്പിക്കുന്നതിൽ പരാജയപ്പെട്ടാലും, ലാൻഡർ പ്രവർത്തിച്ചാൽ അത് ഒരു അത്ഭുതമായിരിക്കുമെന്ന് മുൻ ഐഎസ്ആർഒ ശാസ്ത്രജ്ഞൻ തപൻ മിശ്ര ഇന്നലെ പറഞ്ഞു.

‘യഥാർത്ഥത്തിൽ ചന്ദ്രയാൻ ലാൻഡർ റോവർ രൂപകൽപ്പന ചെയ്തത് 14 ദിവസത്തെ പ്രവർത്തനത്തിന് മാത്രമായിരുന്നു. താപനില -140 ഡിഗ്രി സെൽഷ്യസിലേക്കോ അതിൽ കുറവോ താഴുമെന്ന് പ്രതീക്ഷിക്കുന്നു. ദക്ഷിണധ്രുവത്തിൽ ഇത് -200 ഡിഗ്രി സെൽഷ്യസ് വരെ എത്താം. ഈ ഊഷ്മാവിൽ, ഒരു പ്ലാസ്റ്റിക് മെറ്റീരിയലോ കാർബൺ പവർ മെറ്റീരിയലോ ഇലക്ട്രോണിക്സ് ഒന്നും നിലനിൽക്കില്ല. അവ പൊട്ടും. എന്നാൽ ഐഎസ്ആർഒ ഒരുപാട് തെർമൽ മാനേജ്മെന്റ് കാര്യങ്ങൾ ചെയ്തിട്ടുണ്ടാകുമെന്ന് ഞാൻ പ്രതീക്ഷിക്കുന്നു’, തപൻ മിശ്ര പറഞ്ഞു.

റോവർ അതിന്റെ അസൈൻമെന്റുകൾ പൂർത്തിയാക്കിയ ശേഷമാണ് സ്ലീപ്പ് മോഡിലേക്ക് മാറ്റിയത്. APXS, LIBS പേലോഡുകൾ ഓഫാക്കി. നിലവിൽ ബാറ്ററി പൂർണ്ണമായി ചാർജ്ജാണ്. 2023 സെപ്‌റ്റംബർ 22-ന് പ്രതീക്ഷിക്കുന്ന അടുത്ത സൂര്യോദയത്തിൽ പ്രകാശം ലഭിക്കുന്നതിന് വേണ്ടിയാണ് സോളാർ പാനൽ രൂപകൽപ്പന ചെയ്‌തിരിക്കുന്നത്. റിസീവർ ഓണാണ്. മറ്റൊരു കൂട്ടം അസൈൻമെന്റുകൾക്കായി റോവർ വീണ്ടും ഉണരും എന്നാണ് പ്രതീക്ഷിക്കുന്നത്. ഇനി അഥവാ റോവർ സ്ലീപ്പ് മോഡിൽ നിന്നും ഉണർന്നില്ലെങ്കിൽ ഇന്ത്യയുടെ ചാന്ദ്ര അംബാസഡറായി അത് എക്കാലവും നിലനിൽക്കും എന്നാണ് ബഹിരാകാശ ഏജൻസി പറയുന്നത്.

ലാൻഡറും റോവറും പുനരുജ്ജീവിപ്പിക്കാൻ ഐഎസ്ആർഒയ്ക്ക് കഴിയുമെങ്കിൽ, ചന്ദ്രയാൻ -3 പേലോഡുകൾ ഉപയോഗിച്ച് വീണ്ടും പരീക്ഷണങ്ങൾ നടത്തും. അങ്ങനെ സംഭവിച്ചാൽ അത് ‘ബോണസ്’ ആയിരിക്കും. ജലത്തിന്റെ സാന്നിധ്യം സ്ഥിരീകരിക്കുന്നതാണ് അടുത്ത പ്രധാന കാര്യമെന്ന് മുൻ ഐഎസ്ആർഒ ശാസ്ത്രജ്ഞൻ തപൻ മിശ്ര പറഞ്ഞു. 200 ഡിഗ്രി സെൽഷ്യസ് താപനിലയെ അതിജീവിച്ച് പ്രവർത്തനത്തിലേക്ക് മടങ്ങിവരുക എന്നതാണ് ‘വിക്രം ലാൻഡറും പ്രഗ്യാനും’ നേരിടുന്ന പ്രധാന വെല്ലുവിളി. ഓൺബോർഡ് ഉപകരണങ്ങൾ ചന്ദ്രനിലെ താഴ്ന്ന താപനിലയെ അതിജീവിക്കുകയാണെങ്കിൽ, മൊഡ്യൂളുകൾക്ക് ജീവൻ തിരികെ ലഭിക്കുകയും അടുത്ത പതിനാല് ദിവസത്തേക്ക് ചന്ദ്രനിൽ നിന്ന് വിവരങ്ങൾ അയയ്ക്കാനുള്ള ദൗത്യം തുടരുകയും ചെയ്യും.