ദുബായ്: ഐസിസി ടി20 റാങ്കിംഗില്‍ ഇന്ത്യയുടെ സൂപ്പർ ബാറ്റ്സ്മാൻ സൂര്യകുമാര്‍ യാദവ് രണ്ടാമത്. രണ്ട് സ്ഥാനങ്ങള്‍ മെച്ചപ്പെടുത്തിയാണ് താരം രണ്ടാം സ്ഥാനത്തേക്ക് ഉയര്‍ന്നത്. വെസ്റ്റ് ഇന്‍ഡീസിനെതിരായ ടി20 പരമ്പരയിലെ മൂന്നാം മത്സരത്തില്‍ 76 റണ്‍സുമായി ഇന്ത്യയുടെ വിജയശില്‍പിയായതിന് പിന്നാലെയാണ് സൂര്യകുമാര്‍ യാദവിന്‍റെ റാങ്കിംഗിലെ കുതിപ്പ്.
പാകിസ്ഥാന്‍ നായകന്‍ ബാബര്‍ അസമാണ് ഒന്നാം സ്ഥാനത്ത്. ഒന്നാമതുള്ള ബാബര്‍ അസമുമായി രണ്ട് റേറ്റിംഗ് പോയന്‍റിന്‍റെ വ്യത്യാസം മാത്രമാണ് സൂര്യകുമാര്‍ യാദവിനുള്ളത്. ബാബറിന് 818 റേറ്റിംഗ് പോയന്‍റും സൂര്യകുമാറിന് 816 റേറ്റിംഗ് പോയന്‍റുമുണ്ട്. വെസ്റ്റ് ഇന്‍ഡീസിനെതിരായ ടി20 പരമ്പരയില്‍ രണ്ട് മത്സരങ്ങള്‍ കൂടി അവശേഷിക്കുന്നതിനാല്‍ ഈ മത്സരങ്ങളില്‍ തിളങ്ങിയാല്‍ സൂര്യകുമാറിന് ബാബറിനെ പിന്തള്ളി ഒന്നാം സ്ഥാനത്തെത്താനാവും.
അതേസമയം, പുതുക്കിയ ഐസിസി ടി20 റാങ്കിംഗില്‍ ആദ്യ പത്തിൽ സൂര്യകുമാര്‍ അല്ലാതെ മറ്റ് ഇന്ത്യൻ ബാറ്റ്സ്മാന്മാരില്ല. പതിനാലാം സ്ഥാനത്തുള്ള ഇഷാന്‍ കിഷനും പതിനാറാം സ്ഥാനത്തുള്ള ക്യാപ്റ്റന്‍ രോഹിത് ശര്‍മയുമാണ് ആദ്യ 20ല്‍ ഇടം നേടിയ മറ്റ് ഇന്ത്യന്‍ താരങ്ങൾ. പുതിയ റാങ്കിംഗില്‍ ഒരു സ്ഥാനം താഴേക്കിറങ്ങി 28-ാം സ്ഥാനത്താണ് മുൻ നായകൻ വിരാട് കോഹ്ലി.
Read Also:- ഹൃദയാഘാത സാധ്യത കുറയ്ക്കാൻ ബദാം!
ശ്രേയസ് അയ്യര്‍ 25-ാം സ്ഥാനത്തും കെഎല്‍ രാഹുല്‍ ഇരുപതാം സ്ഥാനത്തുമാണ്. ബൗളര്‍മാരില്‍ ദക്ഷിണാഫ്രിക്കയുടെ ടബ്രൈസ് ഷംസി ഒന്നാം സ്ഥാനത്ത് തുടരുമ്പോള്‍ ഇന്ത്യയുടെ ഭുവനേശ്വര്‍ കുമാര്‍ എട്ടാം സ്ഥാനം നിലനിര്‍ത്തി. ആദ്യ പത്തില്‍ മറ്റ് ഇന്ത്യന്‍ ബൗളര്‍മാരാരുമില്ല.
Post Your Comments