മുംബൈ: ഇന്ത്യക്ക് ശരിക്കും സ്വാതന്ത്ര്യം കിട്ടിയത് 1947 ല്‍ അല്ലെന്നും 2014 ലാണെന്നും വിവാദ പരാമർശം നടത്തിയ ബോളിവുഡ് നായിക കങ്കണയെ വിമർശിച്ച് മഹാരാഷ്ട്ര ബി.ജെ.പി അധ്യക്ഷന്‍ രംഗത്ത്. 1947ല്‍ ഇന്ത്യ നേടിയ സ്വാതന്ത്ര്യം ഭിക്ഷ ആയിരുന്നു, എന്ന നടി കങ്കണ റണാവത്തിന്‍റെ പരാമര്‍ശം തീര്‍ത്തും തെറ്റാണെന്ന് മഹാരാഷ്ട്ര ബി.ജെ.പി അധ്യക്ഷന്‍ ചന്ദ്രകാന്ത് പാട്ടീല്‍ പറഞ്ഞു.
‘നടി പറഞ്ഞത് പൂര്‍ണമായും തെറ്റാണ്. രാജ്യത്തിന്റെ സ്വാതന്ത്ര്യ സമരത്തെക്കുറിച്ചുള്ള കങ്കണ റണാവത്തിന്‍റെ അഭിപ്രായം തീര്‍ത്തും തെറ്റാണ്. സ്വാതന്ത്ര്യ സമരത്തെക്കുറിച്ച്‌ നിഷേധാത്മക പരാമര്‍ശം നടത്താന്‍ ആര്‍ക്കും അവകാശമില്ല. നടിയെ ഇതു പറയിക്കാന്‍ ഉണ്ടായ കാരണം എന്തെന്ന് അറിയില്ല’, പാട്ടീല്‍ മാധ്യമപ്രവര്‍ത്തകരോട് പറഞ്ഞു.
അതേസമയം, വിവാദ പരാമർശത്തിൽ നടിക്കെതിരെ രൂക്ഷ വിമർശനമാണ് സോഷ്യൽ മീഡിയയിൽ അരങ്ങേറുന്നത്. പലരും താരത്തെ വിമർശിച്ചുകൊണ്ട് രംഗത്തെത്തിയിട്ടുണ്ട്.
Post Your Comments