കോഴിക്കോട്: മൂന്നു വർഷമായി മുടങ്ങിക്കിടക്കുന്ന രാമനാട്ടുകര – വെങ്ങളം ബൈപ്പാസ് ആറു വരിയായി വികസിപ്പിക്കുന്നതിന്റെ നിര്‍മാണം ആഗസ്റ്റ് പത്തിന് മുൻപ് പുനരാരംഭിക്കുമെന്ന് ഗതാഗത മന്ത്രി നിതിന്‍ ഗഡ്കരി ഉറപ്പുനല്‍കിയതായി എം.കെ. രാഘവന്‍ എം.പി അറിയിച്ചു. നാട്ടുകാരുടെ ഈ സ്വപ്നപദ്ധതി കഴിഞ്ഞ മൂന്നുവർഷമായി മുടങ്ങിക്കിടക്കുകയായിരുന്നു.
ഗതാഗത മന്ത്രിയുടെ ഓഫിസില്‍ വച്ചു നടന്ന അവലോകന യോഗത്തിലാണ് പദ്ധതിയ്ക്ക് മന്ത്രി ഉറപ്പുനല്‍കിയത്. ദേശീയപാത അതോറ്റി പ്രോജക്‌ട്‌സ് അംഗം ആര്‍.കെ. പാണ്ഡെ അടക്കം ഉന്നത ഉദ്യോഗസ്ഥര്‍ യോഗത്തില്‍ പങ്കെടുത്തു. രണ്ടു വര്‍ഷത്തിനുള്ളില്‍ പൂര്‍ത്തിയാകേണ്ട പദ്ധതി മൂന്ന് വര്‍ഷമായും തുടങ്ങാതിരുന്നത് എം.പി യോഗത്തില്‍ വിശദീകരിച്ചതോടെ പദ്ധതിക്ക് കരാര്‍ എടുത്ത ഹൈദരാബാദ് ആസ്ഥാനമായ കെ.എം.സി കമ്പനി എം.ഡി വിക്രം റെഡ്ഡിയെ ഗഡ്കരി ഫോണില്‍ നേരിട്ട് വിളിക്കുകയും അന്ത്യശാസനം നല്‍കുകയുമായിരുന്നു.
പദ്ധതി ഏറ്റെടുത്ത കമ്പനിയായ കെ.എം.സിക്ക് നേരത്തേയുണ്ടായിരുന്ന സാമ്പത്തിക പ്രശ്‌നങ്ങളും സ്‌പെഷല്‍ പര്‍പ്പസ് വെഹിക്കിളില്‍ ഓഹരി എടുത്ത, ഈ മേഖലയില്‍ മുന്‍പരിചയമില്ലാത്ത സംസ്ഥാന സര്‍ക്കാര്‍ സ്ഥാപനമായ ഇന്‍കെലും ആണ് ഈ മൂന്നു വർഷത്തെ പ്രതിസന്ധിയ്ക്ക് കാരണമായതെന്ന് യോഗം വിലയിരുത്തി.
പദ്ധതി മന്ത്രിതന്നെ നേരിട്ട് മേല്‍നോട്ടം വഹിക്കാമെന്ന് ഉറപ്പുനല്‍കിയിട്ടുണ്ട്. ആഗസ്റ്റ് 10നകം നിര്‍മാണം തുടങ്ങണമെന്നാവശ്യപ്പെട്ട് മന്ത്രി നല്‍കിയ നിര്‍ദേശം കമ്പനി അംഗീകരിക്കുകയും ചെയ്തു.
Post Your Comments