ജിറൂദ് മിലാനിലെത്തി: ഔദ്യോഗിക പ്രഖ്യാപനം ഉടൻ

മിലാൻ: എ സി മിലാനിലേക്കുള്ള ട്രാൻസ്ഫറിന് മുന്നോടിയായി മെഡിക്കൽ പൂർത്തിയാക്കാൻ ചെൽസി താരം ഒലിവിയെ ജിറൂദ് മിലാനിലെത്തി. സീരി എ ക്ലബായ മിലാനുമായി രണ്ട് വർഷത്തെ കരാറിലാവും മെഡിക്കൽ പൂർത്തിയാക്കിയ ശേഷം ജിറൂദ് ഒപ്പിടുക. താരം ചെൽസിയിൽ നിന്ന് എ സി മിലാനിൽ എത്തുന്നതോടെ ചെൽസിയ്‌ക്ക് ഒരു മില്യൺ പൗണ്ട് ട്രാൻസ്ഫർ തുകയായി ലഭിക്കും.

കൂടാതെ ചെൽസിക്ക് ബോണസായി 1 മില്യൺ പൗണ്ട് ലഭിക്കാനുള്ള വ്യവസ്ഥയും കരാറിലുണ്ട്. കഴിഞ്ഞ വർഷം ചെൽസിയിൽ കരാർ ഒരു വർഷം കൂടി നീട്ടിയ താരം സീസണിന്റെ അവസാനത്തോടെ ചെൽസിയിൽ തുടരാൻ ക്ലബുമായി ധാരണയിൽ എത്തിയിരുന്നു. തുടർന്നാണ് ജിറൂദിനെ സ്വന്തമാക്കാൻ എ സി മിലാൻ രംഗത്തെത്തിയത്. 2018 ലാണ് ജിറൂദ് ആഴ്സണലിൽ നിന്ന് ചെൽസിയിൽ എത്തുന്നത്. ചെൽസിയിൽ 119 മത്സരങ്ങൾ കളിച്ച താരം 39 ഗോളും ക്ലബിനായി നേടിയിട്ടുണ്ട്.

Read Also:- ഇതുകൊണ്ടെന്നും തന്നെ തകർക്കാനാവില്ല: സാക്ക

അതേസമയം, എസി മിലാൻ വിട്ട ഇറ്റാലിയൻ ഗോൾ കീപ്പർ ജിയാൻല്യൂജി ഡൊന്നരുമ്മ പിഎസ്ജിയിലെത്തി. 2026 ജൂൺ വരെയുള്ള അഞ്ച് വർഷ കരാറിലാണ് 22കാരനായ ഡൊന്നരുമ്മ ഫ്രഞ്ച് ക്ലബുമായി കരാറിലെത്തിയിരിക്കുന്നത്. മെഡിക്കൽ വിജയകരമായി പൂർത്തിയാക്കിയ താരം ക്ലബുമായി കരാറിൽ ഒപ്പുവെച്ചു. വമ്പൻ ക്ലബിന്റെ ഭാഗമാവാൻ കഴിഞ്ഞതിൽ അതിയായ സന്തോഷമുണ്ടെന്നും പുതിയ വെല്ലുവിളി ഏറ്റെടുക്കാൻ തയ്യാറാണെന്നും ഇറ്റാലിയൻ കീപ്പർ പറഞ്ഞു.