കേരള പുനർനിർമ്മാണത്തിന് പ്രവാസി സഹായം വിലപ്പെട്ടതെന്ന് മന്ത്രി കെ.ടി ജലീൽ

പ്രളയത്തിൽ തകർന്ന കേരളം പുനർ നിർമ്മിക്കുന്നതിൽ മലയാളി പ്രവാസികളുടെ പങ്ക് വളരെ വിലപ്പെട്ടതാണെന്ന് ഉന്നത വിദ്യാഭ്യാസ, ന്യൂനപക്ഷ ക്ഷേമ വകുപ്പ് മന്ത്രി ഡോ. കെ.ടി. ജലീൽ പറഞ്ഞു. ഉത്തർപ്രദേശിലെ വാരണാസിയിൽ നടക്കുന്ന പ്രവാസി ഭാരതീയ ദിവസ് പതിനഞ്ചാമത് എഡിഷനിലെ കേരളീയ പവലിയൻ ഉദ്ഘാടനം ചെയ്യുകയായിരുന്നു മന്ത്രി. നാടിന്റെ വികസന പ്രവർത്തനങ്ങൾക്ക് പ്രവാസികൾ നൽകിയ സഹായ ഹസ്തം പിൻബലമായിട്ടുണ്ട്. ഇന്ത്യയിൽ നിന്നും 3.1 കോടി ജനങ്ങളും കേരളത്തിലെ നാൽപ്പത് ലക്ഷത്തോളവും പ്രവാസികളായി ലോകത്തിന്റെ പല ഭാഗങ്ങളിലുണ്ട്. ഇവരുടെ ഭൗതികവും സാങ്കേതികവും സാമ്പത്തികവുമായ സഹായങ്ങൾ നാട് വിലമതിപ്പോടെ കാണുന്നതായും മന്ത്രി പറഞ്ഞു.

നോർക്ക വകുപ്പിന്റെ വിവിധ സേവന പദ്ധതികളെ പരിചയപ്പെടുത്തുന്ന സ്റ്റാളും, ഇൻഫർമേഷൻ പബ്‌ളിക് റിലേഷൻസ് വകുപ്പിന്റെ റീബിൾഡ് കേരള സംബന്ധിച്ച് വിവരിക്കുന്ന സ്റ്റാളും, കേരളത്തിന്റെ വിനോദസഞ്ചാര സാധ്യതകളെ പരിചയപ്പെടുത്തുന്ന ടൂറിസം സ്റ്റാളും, വ്യവസായ വകുപ്പിന്റെ കരകൗശല വസ്തുക്കളുടെ പ്രദർശനവും വിൽപ്പനയും ഒരുക്കിയ സ്റ്റാളും പവലിയനിലുണ്ട്. കേരളത്തെ പ്രതിനിധീകരിച്ച് മന്ത്രിയോടൊപ്പം നോർക്ക ആന്റ് ഇൻഡസ്ട്രീസ് പ്രിൻസിപ്പൽ സെക്രട്ടറി ഡോ: കെ. ഇളങ്കോവൻ, നോർക്ക റൂട്ട്‌സ് റസിഡൻറ് വൈസ് ചെയർമാൻ കെ.വരദരാജൻ എന്നിവരും വിവിധ വകുപ്പുകളുടെ പ്രതിനിധികളും പങ്കെടുത്തു. വാരണാസിയിലെ കേരള പവലിയൻ ജനുവരി 23 വരെ തുടരും.