വീട്ടമ്മയെ അശ്ലീല വാട്സാപ്പ് ​ഗ്രൂപ്പിൽ ചേർത്തു; അഡ്മിൻ പിടിയിലായി

മുംബൈ : വീട്ടമ്മയുടെ സമ്മതമില്ലാതെ അശ്ലീല വാട്സാപ്പ് ​ഗ്രൂപ്പിൽ ചേർത്ത അഡ്മിൻ അറസ്റ്റിൽ. വെസ്റ്റ് ബം​ഗാൾ സ്വദേശി മുസ്താഖ് അലി ഷെയ്ഖ് (24)ആണ് പോലീസിന്റെ പിടിയിലായത്. യുവതി നൽകിയ പരാതിയുടെ പേരിലാണ് പോലീസ് കേസെടുത്തത്. അശ്ലീല ചിത്രങ്ങളും വീഡിയോകളും മാത്രം പങ്കുവയ്ക്കുന്ന ത്രിപ്പിൾ എക്സ്എക്സ്എക്സ് (Triple XXX) എന്ന് ​ഗ്രൂപ്പിലാണ് യുവതിയെ അം​ഗമാക്കിയത്.

അഡ്മിനടക്കം 12 പേരാണ് ഗ്രൂപ്പിലുണ്ടായിരുന്നത്. ഇവരാരും തന്നെ യുവതിക്ക് പരിചയമുള്ളവരായിരുന്നില്ല. തുടർന്ന് ഇതുസംബന്ധിച്ച് യുവതി പോലീസിൽ പരാതി നൽകുകയായിരുന്നുവെന്ന് അന്വേഷണ ഉദ്യോ​ഗസ്ഥൻ പറഞ്ഞു.മുംബൈയിലെ ധാരാവിയിൽനിന്നുമാണ് പ്രതി ഷെയ്ഖിനെ പിടികൂടിയത്.

ഐടി ആക്റ്റ് 67,67-എ വകുപ്പ് പ്രകാരമാണ് പ്രതിക്കെതിരെ കേസെടുത്തിരിക്കുന്നത്. പ്രതിയുടെ മൊബൈൽ ഫോൺ വിദ​ഗ്ദ പരിശോധനയ്ക്കായി ഫോറൻസിക് ലാബിലേക്ക് അയച്ചു. ഐടി ആക്റ്റ് 2000 പ്രകാരം, ആദ്യമായാണ് ഇത്തരം കേസിൽ ഒരാൾ പ്രതിയാകുന്നതെങ്കിൽ മിനിമം അഞ്ച് വർഷം വരെ തടവ് ലഭിക്കും.