മറയൂര്‍: ഗര്‍ഭസ്ഥശിശു പെണ്‍കുഞ്ഞാണെന്ന് കരുതി ഗര്‍ഭം അലസിപ്പിക്കുന്നതിനിടെ യുവതി മരിച്ചു. എന്നാൽ ഇവരുടെ പോസ്റ്റ്‌മോര്‍ട്ടം റിപ്പോര്‍ട്ടില്‍ ഗര്‍ഭസ്ഥശിശു ആണ്‍കുട്ടിയായിരുന്നുവന്നു കണ്ടെത്തി. തമിഴ്‌നാട് മധുരക്ക് സമീപം ഉസുലാംപെട്ടി ഉത്തപുരം സ്വദേശി രാമറിന്റെ ഭാര്യ രാമത്തായി(35)ആണ് മരിച്ചത്. അനധികൃതമായി ഗര്‍ഭം അലസിപ്പിച്ച കുറ്റത്തിന് സ്വകാര്യ ആശുപത്രി നഴ്‌സ് ലക്ഷ്മിയെ ഉസുലാംപെട്ടി പൊലീസ് അറസ്റ്റ് ചെയ്തു.
ഇവർക്ക് മൂന്ന് പെണ്‍കുട്ടികളാണുള്ളത്. നാലാമതും ഗര്‍ഭം ധരിപ്പിച്ച രാമത്തായി ഏഴുമാസമായപ്പോള്‍ ശിശു പെണ്‍കുഞ്ഞാണെന്ന് ലക്ഷണം പറഞ്ഞതിനെ തുടര്‍ന്നാണ് ഗര്‍ഭം അലസിപ്പിക്കാന്‍ തീരുമാനിച്ചത്. തുടര്‍ന്ന് സമീപ ഗ്രാമമായ തൊട്ടപ്പനയ്ക്കനൂര്‍ സ്വദേശിനിയായ നഴ്‌സായ ലക്ഷ്മിയെ സമീപിച്ച്‌ ഗര്‍ഭം അലസിപ്പിക്കുന്നതിനിടെ ബുധനാഴ്ചയാണ് മരണം സംഭവിച്ചത്.
മൃതദേഹം മധുര രാജാജി മെഡിക്കല്‍ കോളജില്‍ പോസ്റ്റ്‌മോര്‍ട്ടം നടത്തി. പോസ്റ്റ്‌മോര്‍ട്ടം റിപ്പോര്‍ട്ടില്‍ ഗര്‍ഭസ്ഥശിശു ആണ്‍കുട്ടിയായിരുന്നുവെന്ന് പൊലീസ് വ്യക്തമാക്കി.
Post Your Comments