മാധ്യമങ്ങളുടെ കണ്ണുവെട്ടിച്ച് ഒടുവിൽ ബിഷപ്പെത്തി

എറണാകുളം : ജലന്ധർ ബിഷപ്പ് ഫ്രാങ്കോ മുളയ്‌ക്കൽ കന്യാസ്ത്രീയെ പീഡിപ്പിച്ച സംഭവത്തിൽ രണ്ടാം വട്ടത്തെ ചോദ്യം ചെയ്യലിനായി മാധ്യങ്ങളുടെ കണ്ണുവെട്ടിച്ച് ബിഷപ്പെത്തി. തൃപ്പൂണിത്തുറ ക്രൈംബ്രാഞ്ച് ഓഫീസില്‍ വെച്ചാണ് ചോദ്യം ചെയ്യൽ.  മാധ്യമങ്ങളെല്ലാം ബിഷപ്പിന്റെ വരവിനായി കാത്തിരുന്ന സാഹചര്യത്തിൽ വളരെ ചെറിയ കാറിൽ ഗ്ലാസ് മൂടിയാണ് ബിഷപ്പ് ചോദ്യം ചെയ്യൽ കേന്ദ്രത്തിലെത്തിയത്. ബിഷപ്പിനൊപ്പംകാറിൽ മൂന്ന് പേർ ഉണ്ടായിരുന്നു.

അന്വേഷണ ഉദ്യോഗസ്ഥനടക്കമുള്ള പോലീസ് സംഘം ചോദ്യം ചെയ്യലിനായി എത്തിച്ചേര്‍ന്നിട്ടുണ്ട്. ഐജിയടക്കമുള്ള ഉദ്യോഗസ്ഥര്‍ രണ്ടാം ഘട്ടത്തില്‍ ചോദ്യം ചെയ്യലിനായി എത്തിച്ചേരും. ബിഷപ്പിന് പറയാനുള്ളത് കേട്ട ശേഷം പൊരുത്തക്കേടുകള്‍ തിരുത്താനുള്ള രണ്ടാം ഘട്ട ചോദ്യം ചെയ്യല്‍ ആരംഭിക്കും.

മൂന്ന് ഘട്ടങ്ങളിലായാണ് ചോദ്യം ചെയ്യല്‍ നടക്കുക. ചോദ്യം ചെയ്യലിനായി ആധുനിക രീതിയിലുള്ള സൗകര്യങ്ങളാണ് ഒരുക്കിയിരിക്കുന്നത്. മുറിയിൽ അ‍ഞ്ച് ക്യാമറകൾ സജ്ജമാക്കിയിട്ടുണ്ട്. ബിഷപ്പിന്റെ മൊഴി എടുക്കുന്നത് പൂ‍‍ർണമായും ചിത്രീകരിക്കാനും മുഖഭാവങ്ങളടക്കമുള്ളവ പരിശോധിക്കാനുമാണ് തയ്യാറെടുപ്പുകളെന്നാണ് പോലീസ് വിശദമാക്കുന്നത്.