താൽക്കാലിക വ്യതിയാനത്തിൽ നിന്ന് സമ്പദ്‌വ്യവസ്ഥ തിരിച്ചുവരുന്നുവെന്ന് അരുൺ ജെയ്റ്റ്ലി

സിംഗപ്പൂർ: ഘടനാപരമായ പരിഷ്കാരങ്ങൾ കൊണ്ടുവന്നതിന്റെ ഫലമായി താൽക്കാലികമായി ചില വ്യതിയാനങ്ങൾ സമ്പദ്‌വ്യവസ്ഥയിൽ ഉണ്ടായെന്നും എന്നാൽ ഇതിൽനിന്നും ഇന്ത്യൻ സമ്പദ്‌വ്യവസ്ഥ തിരിച്ചുവരികയാണെന്നും കേന്ദ്ര ധനമന്ത്രി അരുൺ ജയ്റ്റ്ലി. സിംഗപ്പൂരിൽ നടക്കുന്ന മോർഗൻ സ്റ്റാൻലിയുടെ 16–ാം ഏഷ്യാ – പസഫിക് വാർഷിക കോൺഫറൻസിൽ സംസാരിക്കുകയായിരുന്നു അദ്ദേഹം.

ഓഗസ്റ്റ് മാസത്തെ ജിഡിപി നാലു വർഷത്തെ ഏറ്റവും കുറവായ 5.7 ശതമാനമാണു രേഖപ്പെടുത്തിയത്. സമ്പദ്‌വ്യവസ്ഥയുടെ ആ താഴ്ച അവസാനിച്ചതായാണ് എനിക്കു തോന്നുന്നത്. ഇപ്പോൾ അതു മുകളിലേക്കു കയറുകയാണ്. ആഗോളതലത്തിലും സമ്പദ്‌വ്യവസ്ഥ മുകളിലേക്കു കയറുകയാണെന്നും ജയ്റ്റ്ലി വ്യക്തമാക്കി. കുറഞ്ഞത് അടുത്ത 10 വർഷത്തേക്കോ അതിൽക്കൂടുതലോ ഉയർന്ന വളർച്ചാ നിരക്കുണ്ടെങ്കിലേ സാമ്പത്തിക രംഗത്തിന്റെ വികസനവുമായി ഇന്ത്യയ്ക്കു മുന്നോട്ടു പോകാനാകൂയെന്നും ജയ്റ്റ്ലി കൂട്ടിച്ചേർത്തു.