മദ്യ ലഹരിയിൽ ഓട്ടോ ഓടിച്ചു: മറ്റൊരു ഓട്ടോയെ ഇടിച്ച് തെറിപ്പിച്ചു; മൂന്ന് പേർക്ക് പരിക്ക്, ഓട്ടോ ഡ്രൈവർ കസ്റ്റഡിയിൽ

പത്തനംതിട്ട: മദ്യലഹരിയിലായിരുന്ന ഡ്രൈവർ ഓടിച്ച ഓട്ടോറിക്ഷാ നിയന്ത്രണം വിട്ട് മറ്റൊരു ഓട്ടോയെ ഇടിച്ച് തെറിപ്പിച്ചു. പത്തനംതിട്ട അഴൂരിൽ ആണ് സംഭവം. ഇടിയുടെ ആഘാതത്തിൽ യാത്രക്കാരുമായി പോയ ഓട്ടോ തോട്ടിലേക്ക് മറിഞ്ഞു. അപകടത്തിൽ ഗുരുതരമായി പരിക്കേറ്റ ഒരാളെ കോട്ടയം മെഡിക്കൽ കോളേജിലേക്ക് മാറ്റി. അ‌പകടമുണ്ടാക്കിയ സംഭവത്തിൽ ഓട്ടോറിക്ഷാ ഡ്രൈവ‍റെ പൊലീസ് പിടികൂടി. വള്ളിക്കോട് സ്വദേശിയായ രഞ്ജിത്താണ് പിടിയിലായത്.

അഴൂർ ജംഗ്ഷനിൽ വെച്ച് രഞ്ജിത്ത് ഓടിച്ചിരുന്നു ഓട്ടോ കോന്നി ഭാഗത്ത് നിന്ന് വന്ന മറ്റൊരു ഓട്ടോയെ ഇടിച്ചുതെറിപ്പിക്കുകയായിരുന്നു. റോഡിൽ നിന്ന് തെന്നി മാറിയ വാഹനം യാത്രക്കാരുമായി തോട്ടിലേക്ക് മറിയുകയായിരുന്നു. അഗ്നിരക്ഷാ സേനയും പൊലീസും നാട്ടുകാരും ചേർന്ന് വാഹനത്തിൽ കുടുങ്ങിയവരെ രക്ഷപ്പെടുത്തി. അപകടമുണ്ടാക്കിയ ശേഷം നിർത്താതെ പോയ ഓട്ടോ പിന്നീട് പൊലീസ് കസ്റ്റഡിയിലെടുത്തു.