‘തീർത്തും നിരാശാജനകം’: രാജ്യത്തെ ഒരു കളിക്കാരനും സഞ്ജുവിന്‍റെ അവസ്ഥ ആഗ്രഹിക്കില്ലെന്ന് റോബിൻ ഉത്തപ്പ

ഓസ്‌ട്രേലിയയ്‌ക്കെതിരായ വരാനിരിക്കുന്ന മൂന്ന് മത്സരങ്ങളുടെ ഏകദിന പരമ്പരക്കുള്ള ഇന്ത്യൻ ടീമിലേക്ക് സഞ്ജു സാംസണെ തെരഞ്ഞെടുത്തില്ല. വേൾഡ് കപ്പിനുള്ള 15 അംഗ ഇന്ത്യ ടീമിലും സഞ്ജുവിന് ഇടം ലഭിച്ചില്ല. അടുത്തിടെ സമാപിച്ച 2023 ഏഷ്യാ കപ്പിനുള്ള ഇന്ത്യൻ ടീമിലും അദ്ദേഹത്തെ ഉൾപ്പെടുത്തിയിരുന്നില്ല. കഴിഞ്ഞ ദിവസം അജിത് അഗാർക്കറുടെ നേതൃത്വത്തിലുള്ള സെലക്ഷൻ പാനൽ ക്യാപ്റ്റൻ രോഹിത് ശർമ്മ, വിരാട് കോലി, ഹാർദിക് പാണ്ഡ്യ, ജസ്പ്രീത് ബുംറ എന്നിവർക്ക് മൂന്ന് മത്സരങ്ങളുള്ള പരമ്പരയിലെ ആദ്യ രണ്ട് മത്സരങ്ങളിൽ വിശ്രമം അനുവദിച്ചിട്ടുണ്ട്. ഇതോടെ തന്നെ തിരിച്ചുവിളിക്കുമെന്ന് സഞ്‍ജു പ്രതീക്ഷിച്ചിരുന്നിരിക്കാം. എന്നാൽ, അവിടെയും സഞ്‍ജുവിനെ അവഗണിച്ച് റുതുരാജ് ഗെയ്ക്ക്വാദ്, തിലക് വർമ്മ തുടങ്ങിയ യുവതാരങ്ങൾക്ക് അവസരം നൽകാനാണ് സെലക്ടർമാരുടെ തീരുമാനം.

ഓസ്‌ട്രേലിയയ്‌ക്കെതിരായ മൂന്ന് മത്സര ഏകദിന പരമ്പരയ്ക്കുള്ള ഇന്ത്യൻ ടീമിൽ നിന്ന് സഞ്ജു സാംസണെ ഒഴിവാക്കാനുള്ള സെലക്ടർമാരുടെ തീരുമാനത്തിനെതിരെ കടുത്ത വിമര്‍ശനങ്ങളാണ് ഉയരുന്നത്. സഞ്ജുവിനോടുള്ള അവഗണനയില്‍ പ്രതികരിച്ച് രംഗത്തെത്തിയിരിക്കുകയാണ് മുന്‍ ഇന്ത്യന്‍ താരം റോബിന്‍ ഉത്തപ്പ. ടീമിലുണ്ടെങ്കിലും സഞ്ജുവിന് പ്ലേയിംഗ് ഇലവനില്‍ കളിക്കാന്‍ അവസരം ലഭിക്കില്ല എന്നതായിരിക്കും ഒഴിവാക്കാനുള്ള കാരണമായി അവര്‍ പറയുക. എന്നാല്‍, ടീമില്‍ പോലുമില്ലാതിരിക്കുന്നത് ശരിക്കും നിരാശാജനകമാണെന്നും ഉത്തപ്പ ട്വിറ്ററില്‍ കുറിച്ചു. രാജ്യത്തെ ഒരു കളിക്കാരനും സഞ്ജുവിന്‍റെ അവസ്ഥ ആഗ്രഹിക്കുന്നുണ്ടാകില്ലെന്ന് ഉത്തപ്പ കൂട്ടിച്ചേർത്തു.

2021 ജൂലൈയിൽ ഏകദിനത്തിൽ അരങ്ങേറ്റം കുറിച്ച സാംസൺ 13 ഏകദിനങ്ങൾ കളിച്ചിട്ടുണ്ട്, 55.71 ശരാശരിയിലും 104.00 സ്ട്രൈക്ക് റേറ്റിലും 390 റൺസ് നേടിയിട്ടുണ്ട്. 2022 ൽ ലക്‌നൗവിൽ ദക്ഷിണാഫ്രിക്കയ്‌ക്കെതിരെ പുറത്താകാതെ 86 റൺസ് നേടിയതാണ് അദ്ദേഹത്തിന്റെ മികച്ച പ്രകടനം.