ചെന്നൈ: സനാതന ധർമ്മത്തെക്കുറിച്ചുള്ള തന്റെ വിവാദ പരാമർശങ്ങൾക്ക് പിന്നാലെ ബി.ജെ.പിയെ രൂക്ഷമായി വിമർശിച്ച് തമിഴ്‌നാട് മന്ത്രി ഉദയനിധി സ്റ്റാലിൻ. ബി.ജെ.പിയെ ‘വിഷപ്പാമ്പ്’ എന്നാണ് അദ്ദേഹം വിളിക്കുന്നത്. പ്രതിപക്ഷമായ എ.ഐ.എ.ഡി.എം.കെയെ ‘പാമ്പുകൾക്ക് അഭയം നൽകുന്ന മാലിന്യം’ എന്നാണ് ഉദയനിധി സ്റ്റാലിൻ പരിഹസിച്ചത്. ഞായറാഴ്ച തമിഴ്‌നാട്ടിലെ നെയ്‌വേലിയിൽ ഡി.എം.കെ എം.എൽ.എ സഭാ രാജേന്ദ്രന്റെ വിവാഹ ചടങ്ങിൽ സംസാരിക്കുകയായിരുന്നു അദ്ദേഹം.
ലോക്‌സഭാ എം.പിയും ഡി.എം.കെ ഡെപ്യൂട്ടി ജനറൽ സെക്രട്ടറിയുമായ എ രാജ പ്രധാനമന്ത്രി നരേന്ദ്ര മോദിയെ പാമ്പിനോട് ഉപമിച്ച് ദിവസങ്ങൾക്ക് ശേഷമാണ് ഉദയനിധി സ്റ്റാലിന്റെ പരാമർശം. ‘വിഷമുള്ള പാമ്പ് നിങ്ങളുടെ വീട്ടിൽ പ്രവേശിച്ചാൽ, അത് നിങ്ങളുടെ വീടിനടുത്തുള്ള ചപ്പുചവറുകളിൽ ഒളിച്ചിരിക്കാൻ സാധ്യതയുള്ളതിനാൽ അതിനെ വലിച്ചെറിഞ്ഞാൽ മാത്രം പോരാ. നിങ്ങൾ കുറ്റിക്കാടുകൾ വെട്ടിമാറ്റിയില്ലെങ്കിൽ, പാമ്പ് നിങ്ങളുടെ വീട്ടിലേക്ക് തിരിച്ച് വരും’, ഉദയനിധി പറഞ്ഞു.
‘ഇപ്പോൾ, ഇത് നിലവിലെ സാഹചര്യവുമായി താരതമ്യം ചെയ്താൽ, തമിഴ്‌നാടിനെ ഞങ്ങളുടെ വീടായും വിഷപ്പാമ്പിനെ ബി.ജെ.പിയായും ഞങ്ങളുടെ വീടിനടുത്തുള്ള ചപ്പുചവറുകളെ എ.ഐ.എ.ഡി.എം.കെയായും ഞാൻ കരുതുന്നു. നിങ്ങൾ ചപ്പുചവറുകൾ നീക്കം ചെയ്തില്ലെങ്കിൽ നിങ്ങൾക്ക് സുരക്ഷയില്ല. ബി.ജെ.പിയെ തുരത്താൻ എ.ഐ.എ.ഡി.എം.കെ.യെയും ഇല്ലാതാക്കണം’, അദ്ദേഹം കൂട്ടിച്ചേർത്തു.
തന്റെ സനാതന ധർമ്മ പരാമർശത്തെ കുറിച്ച് സംസാരിച്ച ഉദയനിധി സ്റ്റാലിൻ, തന്റെ അഭിപ്രായങ്ങൾ തെറ്റായി വ്യാഖ്യാനിക്കുകയും വംശഹത്യയുടെ ആഹ്വാനമായി തെറ്റായി ചിത്രീകരിക്കുകയും ചെയ്തുവെന്ന് ആവർത്തിച്ചു. തന്റെ വാക്കുകൾ വളച്ചൊടിക്കുകയും വംശഹത്യക്ക് ആഹ്വാനം ചെയ്തുവെന്ന് അവകാശപ്പെടുകയും ചെയ്തു. സത്യം പറഞ്ഞാൽ, കഴിഞ്ഞ അഞ്ച് മാസമായി ബിജെപി ഭരിക്കുന്ന മണിപ്പൂരിൽ വംശഹത്യയാണ് നടക്കുന്നത് എന്നും നൂറുകണക്കിന് ആളുകൾ കൊല്ലപ്പെട്ടു എന്നും ഉദയനിധി പറഞ്ഞു.
Post Your Comments