പാറശ്ശാല: അമരവിള എക്സൈസ് ചെക്‌പോസ്റ്റില്‍ എം.ഡി.എം.എയുമായി യുവാവ് അറസ്റ്റില്‍. നെടുമങ്ങാട് താലൂക്കില്‍ വട്ടപ്പാറ വില്ലേജില്‍ ചിറ്റാഴ ദേശത്ത് പുന്നക്കുന്ന് ജെബിന്‍ നിവാസില്‍ ജസ്റ്റിന്‍ രാജിനെയാണ് (21) അറസ്റ്റ് ചെയ്തത്. 10.15 ഗ്രാം എം.ഡി.എം.എ ഇയാളിൽ നിന്ന് പിടിച്ചെടുത്തു.
ബുധനാഴ്ച ഉച്ചക്കാണ് സംഭവം. ചെക്‌പോസ്റ്റില്‍ സര്‍ക്കിള്‍ ഇന്‍സ്‌പെക്ടര്‍ സി.പി. പ്രവീണിന്റെ നേതൃത്വത്തില്‍ നടത്തിയ വാഹനപരിശോധനയിൽ ആണ് നാഗര്‍കോവിലില്‍ നിന്ന് വന്ന കാറിൽ നിന്ന് എം.ഡി.എം.എയുമായി ഇയാളെ പിടികൂടിയത്.
ഇയാള്‍ ബംഗളൂരുവില്‍ നിന്ന് എം.ഡി.എം.എ വാങ്ങി ടൂറിസ്റ്റ് ബസില്‍ നാഗര്‍കോവിലില്‍ എത്തുകയും അവിടെ നിന്ന് ടാക്‌സി കാറില്‍ തിരുവനന്തപുരത്തേക്ക് വരികയുമായിരുന്നു. ഇയാളുടെ കൂട്ടാളി കവടിയാര്‍ സ്വദേശിയെ കുറിച്ച് സൂചന ലഭിച്ചിട്ടുണ്ട്. ടെക്‌നോപാര്‍ക് ഉള്‍പ്പടെ ഇടങ്ങളില്‍ ലഹരിവിതരണത്തിന്റെ പ്രധാന കണ്ണിയാണിയാളെന്നാണ് ലഭിക്കുന്ന വിവരം.
ഇയാള്‍ക്കെതിരെ അന്വേഷണം ആരംഭിച്ചു. സര്‍ക്കിള്‍ ഇന്‍സ്‌പെക്ടര്‍ സി.പി. പ്രവീണ്‍, എക്സൈസ് ഇന്‍സ്‌പെക്ടര്‍ മോനി രാജേഷ്, സിവില്‍ എക്സൈസ് ഓഫിസര്‍മാരായ നജിമുദീന്‍, മുഹമ്മദ് മിലാദ്, ശ്രീകാന്ത് എന്നിവര്‍ ചേര്‍ന്നാണ് പ്രതിയെ പിടികൂടിയത്. അറസ്റ്റ് ചെയ്ത യുവാവിനെ കോടതിയിൽ ഹാജരാക്കിയ ശേഷം റിമാൻഡ് ചെയ്തു.
Post Your Comments