തൃക്കൊടിത്താനം: യുവാവിനെ ആക്രമിച്ചു കൊലപ്പെടുത്താന്‍ ശ്രമിച്ച കേസില്‍ അഞ്ചുപേർ അറസ്റ്റിൽ. തലവടി ചക്കുളത്തുകാവ് ഭാഗത്ത് മുക്കാടന്‍ ശ്രീലാല്‍ (34), ആലപ്പുഴ തുമ്പോളി കൊമ്മാടി ഭാഗത്ത് കാട്ടുങ്കല്‍ അനീഷ് ആന്‍റണി(42), ചങ്ങനാശേരി ഹിദായത്ത് നഗര്‍ ഭാഗത്ത് തോട്ടപ്പറമ്പില്‍ നിജാസ് (30), ചങ്ങനാശേരി പച്ചക്കറി മാര്‍ക്കറ്റ് ഭാഗത്ത് മുണ്ടക്കല്‍ സാം സന്തോഷ് (22), ചങ്ങനാശേരി പെരുന്ന എസ്എച്ച് സ്‌കൂളിനു സമീപം പാലത്തുങ്കല്‍ സാവിയോ സെബാസ്റ്റ്യന്‍ ജോസഫ് (22) എന്നിവരെയാണ് അറസ്റ്റ് ചെയ്തത്. തൃക്കൊടിത്താനം പൊലീസ് ആണ് അറസ്റ്റ് ചെയ്തത്.
ശനിയാഴ്ച വൈകുന്നേരത്തോടെയാണ് കേസിനാസ്പദമായ സംഭവം. ഇവര്‍ സംഘം ചേര്‍ന്ന് കിളിമല എസ്എച്ച് സ്‌കൂളിന്‍റെ സമീപത്ത് പായിപ്പാട് സ്വദേശിയായ അഭിജിത്തിനെ ആക്രമിച്ചതിനുശേഷം കുത്തിക്കൊലപ്പെടുത്താന്‍ ശ്രമിക്കുകയായിരുന്നു. ഗുഡ്‌സ് ഓട്ടോറിക്ഷ ഡ്രൈവറായ യുവാവും ഇവരും തമ്മില്‍ സംഭവം നടക്കുന്നതിന് തലേദിവസം രാത്രിയില്‍ വാക്ക് തര്‍ക്കമുണ്ടായിരുന്നു. ഇതിന്‍റെ തുടര്‍ച്ചയായിട്ടാണ് അടുത്തദിവസം കാറിലെത്തിയ ഇവര്‍ യുവാവിനെ സ്‌കൂളിന് സമീപത്തുവച്ച് ആക്രമിച്ച് കൊലപ്പെടുത്താന്‍ ശ്രമിച്ചത്. ഇവരുടെ ആക്രമണത്തില്‍ വയറിന് കുത്തുകൊണ്ട യുവാവ് കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലാണ്.
പരാതിയുടെ അടിസ്ഥാനത്തിൽ തൃക്കൊടിത്താനം പൊലീസ് കേസ് രജിസ്റ്റര്‍ ചെയ്യുകയും ഒളിവില്‍ കഴിഞ്ഞിരുന്ന ഇവരെ വിവിധ ഇടങ്ങളില്‍ നിന്നായി പിടികൂടുകയുമായിരുന്നു.
Post Your Comments