മദ്യപിച്ച് ബൈക്കോടിച്ചു: ചോദ്യംചെയ്ത പൊലീസിന് നേരെ കൈയേറ്റശ്രമം, എസ്എഫ്ഐ ഏരിയഭാരവാഹികള്‍ ഉള്‍പ്പെടെ മൂന്നുപേർ അറസ്റ്റിൽ

കൊട്ടാരക്കര: മദ്യപിച്ച് ബൈക്കോടിക്കുകയും അത് മറിഞ്ഞപ്പോൾ ചോദ്യം ചെയ്ത  പൊലീസിനെ കൈയേറ്റം ചെയ്യാന്‍ ശ്രമിക്കുകയും ചെയ്ത സംഭവത്തില്‍ എസ്എഫ്ഐ ഏരിയ ഭാരവാഹികള്‍ ഉള്‍പ്പെടെ മൂന്ന് പേര്‍ അറസ്റ്റിൽ. എസ്എഫ്ഐ കൊട്ടാരക്കര ഏരിയ പ്രസിഡന്റ് അജു (23), സെക്രട്ടറി അലീം (22), അര്‍ജുന്‍ (21) എന്നിവരെയാണ് കൊട്ടാരക്കര പൊലീസ് അറസ്റ്റ് ചെയ്തത്.

കൊട്ടാരക്കര ചന്തമുക്കിലായിരുന്നു സംഭവം. മൂവരും ഒരുമിച്ച് ഒരു ബൈക്കിൽ മദ്യപിച്ച് സഞ്ചരിക്കുകയും ഈ ബൈക്ക് ചന്തമുക്കില്‍ നിയന്ത്രണം വിട്ടു മറിയുകയുമായിരുന്നു. ഗതാഗതക്കുരുക്കിനു കാരണമായതറിഞ്ഞു സ്ഥലത്തെത്തിയ എസ്ഐ ബാലാജിയും സംഘവും ഇവരെ കസ്റ്റഡിയിലെടുക്കാന്‍ ശ്രമിച്ചപ്പോഴാണ് കൈയേറ്റശ്രമമുണ്ടായത്.

അജു എസ്ഐയെ അസഭ്യം പറയുകയും ഭീഷണിപ്പെടുത്തുകയും കോളറിനു കുത്തിപ്പിടിച്ചു കൈയേറ്റം ചെയ്യാന്‍ ശ്രമിക്കുകയുമായിരുന്നെന്ന് പൊലീസ് പറയുന്നു. അലീമാണ് ബൈക്ക് ഓടിച്ചിരുന്നത്.