തിരുവനന്തപുരം: ഇന്ദിരാഗാന്ധിക്ക് ഇന്ത്യയിലെ ജനങ്ങൾ നൽകിയ മറുപടി പ്രധാനമന്ത്രി നരേന്ദ്ര മോദിക്കും നൽകണമെന്ന് സി.പി.എം ജനറല്‍ സെക്രട്ടറി സീതാറാം യെച്ചൂരി. ഇന്ത്യയെന്നാൽ ഇന്ദിരയല്ലെന്ന് കാട്ടിക്കൊടുത്തത് പോലെ മോദിയെന്നാൽ ഇന്ത്യയല്ലെന്ന് കാട്ടിക്കൊടുക്കണമെന്നാണ് അദ്ദേഹത്തിന്റെ ആഹ്വാനം. എം വി ഗോവിന്ദൻ നയിച്ച ജനകീയ പ്രതിരോധ ജാഥയുടെ സമാപന സമ്മേളനത്തിൽ സംസാരിക്കുകയായിരുന്നു സീതാറാം യെച്ചൂരി.
മോദിക്കെതിരെ ശബ്ദമുയർത്തുന്നവരെ രാജ്യദ്രോഹികളെന്ന് മുദ്ര കുത്താനാണ് ശ്രമമെന്നും യെച്ചൂരി കുറ്റപ്പെടുത്തി. കേരളത്തെ കുറിച്ച് തെറ്റായ പ്രചാരണങ്ങൾ നടക്കുന്നുവെന്നും, അതിനെല്ലാം മറുപടി പറയാനാണ് താൻ വന്നതെന്നും അദ്ദേഹം പറഞ്ഞു. കേരളത്തെ കുറിച്ചുള്ള തെറ്റായ പ്രചാരണങ്ങൾ തിരുത്താനാണ് താൻ വന്നതെങ്കിലും, രാഷ്‌ട്രപതിയുടെ സന്ദർശനത്തോടെ അത് എളുപ്പമാക്കിയെന്നും കേരള സർക്കാരിന് നല്ല സർട്ടിഫിക്കറ്റാണ് ദ്രൗപദി മുര്‍മു നൽകിയതെന്ന് യെച്ചൂരി കൂട്ടിച്ചേര്‍ത്തു.
ബിജെപി ഇതര സർക്കാർ എന്ന നിലയിൽ ബദൽ നയങ്ങൾ മുന്നോട്ട് വെക്കുകയാണ് ഇടത് സർക്കാർ ചെയ്യുന്നത്. ചങ്ങാത്ത മുതലാളിത്തത്തിന്റെ മുഖമാണ് കേന്ദ്രത്തിൽ കാണുന്നത്. അദാനി വിഷയത്തിൽ ജെപിസി അന്വേഷണത്തിന് മോദി സർക്കാർ തയ്യാറാവാത്തത് എന്താണെന്നും യെച്ചൂരി ചോദിച്ചു.
Post Your Comments