വൈക്കം: നിയന്ത്രണംവിട്ട ടിപ്പർ ലോറി ടൂറിസ്റ്റ് ബസുമായി കൂട്ടിയിടിച്ചുണ്ടായ അപകടത്തിൽ ടിപ്പർ ലോറിയുടെ ക്ലീനർക്ക് പരിക്കേറ്റു. തലയോലപ്പറമ്പ് മേവെള്ളൂർ സ്വദേശി ഏലിയാസി(67)നാണ് പരിക്കേറ്റത്. ഇയാൾ വൈക്കം താലൂക്ക് ആശുപത്രിയിൽ ചികിത്സയിലാണ്.
Read Also : സ്വർണവിലയിൽ ഇന്ന് മാറ്റമില്ല : വെള്ളി വിലയിൽ ഇടിവ്, ഇന്നത്തെ നിരക്കുകളറിയാം
വൈക്കം വല്ലകം പള്ളിക്ക് സമീപം ഇന്നലെ വൈകുന്നേരം 5.15-ന് ആയിരുന്നു അപകടം നടന്നത്. സിമന്‍റ് കട്ടയും കയറ്റിവന്ന ടിപ്പർ ലോറിയാണ് നിയന്ത്രണംവിട്ട് ടൂറിസ്റ്റ് ബസുമായി കൂട്ടിയിടിച്ചത്. ഇടിയുടെ ആഘാതത്തിൽ തകർന്ന ലോറിയുടെ മുൻഭാഗത്ത് ഏലിയാസിന്‍റെ കാൽ കുടുങ്ങുകയായിരുന്നു. തുടർന്ന്, ഫയർഫോഴ്സിന്‍റെയും നാട്ടുകാരുടെയും നേതൃത്വത്തിൽ ഫ്രണ്ട് ഡോർ ഗ്യാസ് കട്ടർ ഉപയോഗിച്ച് വെട്ടിപ്പൊളിച്ചാണ് ഇയാളെ ലോറിയിൽ നിന്ന് പുറത്തെടുത്തത്.
അപകടത്തിൽ ടൂറിസ്റ്റ് ബസിന്‍റെ മുൻഭാഗം തകർന്നിട്ടുണ്ട്. ടൂറിസ്റ്റ് ബസിൽ ഏതാനും യാത്രക്കാരുണ്ടായിരുന്നെങ്കിലും ആർക്കും പരിക്കില്ല. അപകടത്തെത്തുടർന്ന് വൈക്കം – തലയോലപ്പറമ്പ് റൂട്ടിൽ ഒരു മണിക്കൂറോളം ഗതാഗതം തടസപ്പെട്ടു. വൈക്കം പൊലീസും ഫയർഫോഴ്സും സ്ഥലത്തെത്തിയാണ് വാഹനങ്ങൾ നീക്കി ഗതാഗതം പുനഃസ്ഥാപിച്ചത്.
Post Your Comments