ലോകത്തിലെ ഏറ്റവും വലിയ എലിവേറ്റർ മുംബൈയിൽ : വിസ്മയമൊരുക്കി ജിയോ വേൾഡ് സെന്റർ

മുംബൈ: ലോകത്തിലെ ഏറ്റവും വലിയ എലിവേറ്റർ മുംബൈയിൽ സ്ഥാപിച്ചു. ബാന്ദ്രയിലെ കുർല കോംപ്ലക്സിലുള്ള ജിയോ വേൾഡ് സെന്ററിൽ ആണ് ലോകത്തിലെ ഏറ്റവും വലിയ എലിവേറ്റർ പണി കഴിപ്പിക്കപ്പെട്ടത്.

25.78 മീറ്റർ സ്ക്വയർ വിസ്തൃതിയുള്ള ഈ ഭീമൻ എലിവേറ്ററിന് ഒരു ഇടത്തരം ഫ്ലാറ്റിന്റെ വലുപ്പമുണ്ട്. ലിഫ്റ്റുകൾ നിർമ്മിക്കുന്നതിൽ അഗ്രഗണ്യരായ ഫിൻലാൻഡ് കമ്പനി കോണിയാണ് എലിവേറ്ററിന്റെ നിർമ്മാതാക്കൾ. 18 ഭീമൻ പുളളികളിലും ഒൻപത് റോപ്പുകളിലുമായാണ് ഇതിന്റെ പ്രവർത്തനം നിയന്ത്രിക്കപ്പെടുന്നത്. കോണി കമ്പനിയുടെ വിദൂര നിയന്ത്രിത സംവിധാനമായ കോണി-ഇ-ലിങ്ക് എന്ന ഫെസിലിറ്റി മാനേജ്മെന്റ് സംവിധാനം ഉപയോഗിച്ച് എവിടെ നിന്ന് വേണമെങ്കിലും ഈ എലിവേറ്റർ നിയന്ത്രിക്കാൻ സാധിക്കും.

ഗ്ലാസ് കൊണ്ടു നിർമ്മിച്ച നാല് വാതിലുകൾ ആണ് ഈ ഭീമൻ എലിവേറ്ററിൽ ഉള്ളത്. ഇവയ്ക്കിടയിൽ, ന്യൂസുകളും അപ്ഡേറ്റുകളും കാണുന്ന സ്ക്രീനുകൾ സ്ഥാപിച്ചിട്ടുണ്ട്. പതിനെട്ടര ഏക്കർ വിസ്തൃതിയിൽ, മുംബൈ നഗരമധ്യത്തിൽ സ്ഥാപിക്കപ്പെട്ട ജിയോ വേൾഡ് സെന്റർ, ഇന്ത്യയുടെ വ്യാവസായിക, സാമ്പത്തിക, സാംസ്കാരിക കേന്ദ്രമായി മാറുമെന്നാണ് അധികൃതർ പ്രതീക്ഷിക്കുന്നത്.