മീൻ വിൽപ്പനക്കാരന് നേരെ ആക്രമണം : രണ്ടുപേർ പൊലീസ് പിടിയിൽ

പറവൂർ: മീൻ വിൽപ്പനക്കാരനെ ആക്രമിച്ച കേസിൽ രണ്ട് യുവാക്കൾ അറസ്റ്റിൽ. കൊടുങ്ങല്ലൂർ കോട്ടപ്പുറം പറമ്പേൽ വീട്ടിൽ മിഷോൺ വർഗീസ് (21), ചോഴിയത്ത് വീട്ടിൽ മൈക്കിൾ സാനു (18) എന്നിവരെയാണ് പൊലീസ് അറസ്റ്റ് ചെയ്തത്. പുത്തൻവേലിക്കര പൊലീസാണ് പ്രതികളെ അറസ്റ്റ് ചെയ്തത്.

കഴിഞ്ഞ ഒമ്പതിന് ആയിരുന്നു കേസിനാസ്പദമായ സംഭവം. പുത്തൻവേലിക്കര കപ്പേളക്കുന്ന് സ്വദേശി രാമനാണ് മർദ്ദനമേറ്റത്. മീൻ വിലകുറച്ച് നൽകണമെന്നാവശ്യപ്പെട്ടായിരുന്നു മർദ്ദിച്ചത്. ഗുരുതര പരിക്കേറ്റ രാമൻ ചികിത്സയിലാണ്.

Read Also : കല്ലെടുത്ത് കോൺഗ്രസ് ഓഫീസിൽ കൊണ്ടുവെച്ചാൽ പദ്ധതി ഇല്ലാതാവില്ല, കല്ലിടാതെയും പദ്ധതി നടത്താം: കോടിയേരി

ഒളിവിൽ പോയ പ്രതികളെ ഇൻസ്പെക്ടർ വി. ജയകുമാർ, എസ്.ഐ എം.എസ്. മുരളി, എ.എസ്.ഐ സി.എ. ഷാഹിർ, സി.പി.ഒമാരായ ജുബി, മൃദുൽ, ഷിബു, ഷീജ, സിന്ധു തുടങ്ങിയവർ ചേർന്നാണ് പിടികൂടിയത്. പ്രതികളെ കോടതിയിൽ ഹാജരാക്കി.