ചങ്ങനാശേരി: പട്ടാപ്പകൽ വീട്ടിൽ അതിക്രമിച്ചു കയറി യുവതിയെ പീഡിപ്പിക്കാൻ ശ്രമിക്കുകയും ക്രൂരമായി ഉപദ്രവിക്കുകയും ചെയ്തതായി പരാതി. സംഭവവുമായി ബന്ധപ്പെട്ട് പ്രതിയായ തൃക്കൊടിത്താനം സ്വദേശി അനീഷിനെ പൊലീസ് കസ്റ്റഡിയിൽ എടുത്തെങ്കിലും തൃക്കൊടിത്താനം പൊലീസ് വിവരങ്ങൾ നൽകാൻ തയ്യാറായില്ല.
വ്യാഴാഴ്ച ഉച്ചയ്ക്ക് 12-ന് ആണ് കേസിനാസ്പദമായ സംഭവം. പായിപ്പാട് കൊച്ചുപള്ളിക്കു സമീപം 26കാരിയായ യുവതിയാണ് അതിക്രൂരമായ ആക്രമണത്തിന് ഇരയായത്.
യുവതിയുടെ ഭർതൃമാതാവും പിതാവും ആശുപത്രിയിൽ പോയിരിക്കുകയായിരുന്നു. വീട്ടിൽ നിന്നും ഭർതൃമാതാപിതാക്കൾ പോവുന്നതു കണ്ട് യുവതി തനിച്ചാണെന്ന് മനസിലാക്കിയാണ് ഇയാൾ വീട്ടിലെത്തി ഉപദ്രവിച്ചതെന്നു ബന്ധുക്കൾ പറഞ്ഞു.
ഓടി രക്ഷപ്പെടാൻ ശ്രമിച്ച യുവതിയെ പ്രതി അതിക്രൂരമായി മർദ്ദിച്ചു. മർദ്ദനമേറ്റ് ബോധം നഷ്ടപ്പെട്ട യുവതിയെ ഉപേക്ഷിച്ച് പ്രതി രക്ഷപ്പെട്ടു.
തുടർന്ന്, വീട്ടിലെത്തിയ ഭർതൃമാതാവും പിതാവും അവശനിലയിലായ ഇവരെ നാലുകോടി സെന്‍റ് റീത്താസ് ആശുപത്രിയിലും ഉന്നത ചികിത്സയ്ക്കായി ചങ്ങനാശേരിയിലെ ജനറൽ ആശുപത്രിയിലും പ്രവേശിപ്പിക്കുകയായിരുന്നു.
Post Your Comments