മുംബൈ: കരിയർ അവസാനിപ്പിക്കുന്നതായി പ്രഖ്യാപിച്ച് സൽമാൻ ഖാൻ അവതാരകനായ ബിഗ് ബോസ് 11ൽ പങ്കെടുത്ത നടി മെഹ്ജബി സിദ്ദിഖി. ‘തന്റെ സ്രഷ്ടാവിന്റെ കൽപ്പനകൾ’ പാലിക്കുന്നതിനായി ഗ്ലാമറസ് ലോകം വിടുകയാണെന്ന് മെഹ്ജബി തന്റെ ഇൻസ്റ്റാഗ്രാമിൽ പോസ്റ്റ് ചെയ്ത കുറിപ്പിൽ വ്യക്തമാക്കി. ഇനിമുതൽ താൻ ഇപ്പോഴും ഹിജാബ് ധരിക്കുമെന്നും അവർ അറിയിച്ചു. കഴിഞ്ഞ രണ്ട് വര്‍ഷമായി സംതൃപ്തിയില്ലാത്ത ജീവിതമാണ് താൻ നയിച്ചതെന്ന് വെളിപ്പെടുത്തിയ മെഹ്ജബി, അള്ളാഹുവിനെ അനുസരിക്കാത്ത മനുഷ്യര്‍ക്ക് ശാന്തി കിട്ടില്ലെന്നും പറഞ്ഞു.
‘രണ്ട് വർഷമായി ഞാൻ വളരെ വിഷമത്തിലായിരുന്നു. സംതൃപ്‌തി ഇല്ലാത്ത ജീവിതമായിരുന്നു. ജീവിതത്തിൽ സന്തോഷവും സംതൃപ്തിയും ലഭിക്കാൻ എന്ത് ചെയ്യണെമെന്ന് എനിക്ക് ഒരു ധാരണയും ഇല്ലായിരുന്നു. ഒരു വ്യക്തി പാപം ചെയ്യുമ്പോൾ, പാപത്തിന്റെ നാണക്കേട് ചുരുങ്ങിയ സമയത്തിനുള്ളിൽ അവസാനിക്കും, എന്നാൽ നമ്മൾ ചെയ്ത ദുഷ്കർമത്തിന്റെ ഫലം നമ്മുടെ മരണം വരെ നിലനിൽക്കും. അല്ലാഹുവിനോട് അനുസരണക്കേട് കാണിക്കുന്നവർക്ക് ഒരിക്കലും വിശ്രമം ലഭിക്കില്ല. മനുഷ്യരെ എത്ര പ്രസാദിപ്പിക്കാൻ ശ്രമിച്ചാലും എത്ര സമയം കൊടുത്താലും ആളുകൾ നിങ്ങളെ ഒരിക്കലും അഭിനന്ദിക്കില്ല. അല്ലാഹുവിനെ അനുനയിപ്പിക്കാൻ സമയം ചെലവഴിക്കുന്നതാണ് എനിക്കും നിങ്ങൾക്കും നല്ലതെന്ന് ഞാൻ കരുതുന്നു’, മെഹ്ജബി വ്യക്തമാക്കി.
‘സനാ ഖാന്‍ എന്ന സഹോദരിയെ ഞാന്‍ ഒരു വര്‍ഷമായി ശ്രദ്ധിക്കുന്നുണ്ടായിരുന്നു. അവരുടെ വീഡിയോകളും മതപരമായ പരിപാടികളും കാണുന്നത് എനിക്ക് ഏറെ ഇഷ്ടമായിരുന്നു’, മെഹ്ജബി ഇൻസ്റ്റഗ്രാമിൽ കുറിച്ചു. ബിഗ് ബോസ് സീസണ്‍ 11 ലെ മത്സരാര്‍ത്ഥിയായിരുന്നു മെഹ്ജബി. ബിഗ് മത്സരാര്‍ത്ഥിയായിരുന്നു സന ഖാനും. 2020 ലാണ് സന ഖാന്‍ സിനിമ മേഖല വിടുന്നത്. ഇതിന് പിന്നാലെയാണ്, ഇപ്പോൾ മെഹ്ജബിയും കരിയർ അവസാനിപ്പിക്കുന്നതായി വെളിപ്പെടുത്തിയത്.
Post Your Comments