പനാജി: കോൺഗ്രസ് നേതാവ് രാഹുൽ ഗാന്ധിക്ക് നരേന്ദ്രമോദി ഫോബിയയാണെന്ന് പരിഹസിച്ച് കേന്ദ്ര ആഭ്യന്തരമന്ത്രി അമിത് ഷാ. ഗോവയിൽ നടക്കുന്ന ബിജെപി തിരഞ്ഞെടുപ്പ് പ്രചരണ പരിപാടികൾക്കിടയിലാണ് ഷാ ഇങ്ങനെ പരാമർശിച്ചത്.
‘നിങ്ങൾക്ക് കോൺഗ്രസ് ഗാന്ധി കുടുംബത്തിലെ ഗോവ തിരഞ്ഞെടുക്കാൻ അല്ലെങ്കിൽ ബിജെപിയുടെ സുവർണ്ണ ഗോവ തിരഞ്ഞെടുക്കാം. അത് നിങ്ങളുടെ തീരുമാനമാണ്. ഈ തീരദേശത്തിന്റെ വികസനം ബിജെപിക്ക് മാത്രം സാധിക്കുന്ന കാര്യമാണ്. ഞങ്ങൾ പൂർത്തിയാക്കാൻ ശ്രമിക്കുന്നത് ഈ നാടിന്റെ അഭിമാനമായിരുന്ന മനോഹർ പരീക്കർജിയുടെ സുവർണ്ണ ഗോവ എന്ന സ്വപ്നമാണ്’ അമിത് ഷാ പറഞ്ഞു.
‘തൃണമൂൽ കോൺഗ്രസ്, ആം ആദ്മി പാർട്ടി, നാഷണലിസ്റ്റ് കോൺഗ്രസ് പാർട്ടി എന്നിവർ ഗോവയിൽ വരാൻ പോകുന്ന തിരഞ്ഞെടുപ്പിൽ മത്സരിക്കുന്നുണ്ട്. എന്നാൽ, ഈ പാർട്ടികൾക്കൊന്നും ഇവിടെ അടിത്തറയില്ല. അതു കൊണ്ടു തന്നെ, സ്ഥിരതയില്ലാത്ത ഇവർക്ക് ഭരണം ലഭിക്കാനും സാധിക്കില്ല. സ്ഥിരതയില്ലാത്ത സർക്കാരിന് ഒരിക്കലും വികസനം കൊണ്ടു വരാൻ സാധിക്കില്ലെന്നത് നൂറു ശതമാനം ഉറപ്പുള്ള കാര്യമാണ്’. തെരഞ്ഞെടുപ്പ് പ്രചാരണത്തിനിടെ അമിത്ഷാ പ്രസംഗിച്ചു.
കേന്ദ്രസർക്കാരിന്റെ സഹായത്തോടെ, കഴിഞ്ഞ ദശാബ്ദങ്ങളിൽ ഗോവയുടെ സമ്പൂർണ്ണ വികസനത്തിനു വേണ്ടി ബിജെപി സർക്കാർ ആത്മാർത്ഥമായി പ്രവർത്തിച്ചിട്ടുണ്ട് എന്നും അദ്ദേഹം ചൂണ്ടിക്കാട്ടി.
Post Your Comments