കോട്ടക്കല്‍: പോലീസ് പിടികൂടി തൊണ്ടിമുതലായി സൂക്ഷിച്ച വാഹനങ്ങളില്‍ നിന്നും ഇലക്ട്രോണിക് ഉപകരണങ്ങള്‍ മോഷ്ടിക്കുകയും വാഹനങ്ങള്‍ പൊളിച്ച് വില്‍ക്കുകയും ചെയ്ത അഞ്ച് പേർ പിടിയിൽ. വേങ്ങരയില്‍ ക്വാര്‍ട്ടേഴ്‌സില്‍ താമസിക്കുന്ന തമിഴ്‌നാട് സ്വദേശികളായ മണികണ്ഠന്‍ (21), മുരുകന്‍(42), ചിതമ്പരന്‍ (23), കരുമ്പില്‍ കൂര്‍മത്ത് മുഹമ്മദ് ശാഫി(40), വേങ്ങര മരുത്തോടിക മുജീബുര്‍റഹ്മാന്‍(55) എന്നിവരാണ് പിടിയിലായത്.
കോട്ടക്കല്‍ പോലീസ് സ്റ്റേഷനില്‍ സൂക്ഷിച്ച വാഹനങ്ങളില്‍ നിന്നാണ് പ്രതികള്‍ സാധനങ്ങൾ മോഷ്ടിച്ചത്. സ്റ്റേഷനിൽ നടന്ന മോഷണം പോലീസ് അറിഞ്ഞിരുന്നില്ലെന്നാണ് സൂചന. സ്റ്റേഷന് സമീപത്ത് സൂക്ഷിച്ച വാഹനങ്ങളില്‍ നിന്നും സാധനങ്ങള്‍ മോഷ്ടിച്ച് കടത്തുന്നുവെന്ന് രഹസ്യവിവരം ലഭിച്ചതിനെത്തുടർന്നാണ് പൊലീസ് പ്രതികളെ പിടികൂടിയത്. തൊണ്ടി മുതല്‍ കടത്തിയിരുന്ന ഗുഡ്‌സ് ഓട്ടോറിക്ഷകളുടെ രണ്ട് ഡ്രൈവര്‍മാരും പിടിയിലായി.
കോട്ടക്കല്‍, തിരൂരങ്ങാടി പോലീസ് പിടികൂടിയ വാഹനങ്ങളാണ് വില്‍പന നടത്താനായി സംഘം പൊളിച്ചു കടത്തിയിരുന്നത്. തൊണ്ടിമുതലും ഗുഡ്‌സ് ഓട്ടോകളും പോലീസ് കസ്റ്റഡിയില്‍ എടുത്തു. പ്രതികളെ കോടതിയില്‍ ഹാജരാക്കി.
Post Your Comments