ന്യൂഡല്‍ഹി: കോണ്‍ഗ്രസ് നേതാവ് രാഹുല്‍ ഗാന്ധിയുടെ ട്വിറ്റര്‍ അക്കൗണ്ട് മരവിപ്പിച്ചതിന് പിന്നാലെ മാധ്യമ മേധാവി രണ്‍ദീപ് സുര്‍ജേവാല ഉള്‍പ്പെടെ മുതിര്‍ന്ന അഞ്ചു കോണ്‍ഗ്രസ് നേതാക്കളുടെയും ട്വിറ്റര്‍ ഹാന്‍ഡിലുകള്‍ക്കെതിരെ സമാന നടപടി സ്വീകരിച്ചതായി കോണ്‍ഗ്രസ്.
രണ്‍ദീപ് സുര്‍ജേവാല, എ.ഐ.സി.സി ജനറല്‍ െസക്രട്ടറിയും മുന്‍ മന്ത്രിയുമായ അജയ് മാക്കന്‍, ലോക്സഭ വിപ്പ് മാണിക്കം ടാഗോര്‍, അസം നേതാവും മുന്‍ കേന്ദ്രമന്ത്രിയുമായ ജിതേന്ദ്ര സിങ്, മഹിള കോണ്‍ഗ്രസ് പ്രസിഡന്‍റ് സുഷ്മിത ദേവ് എന്നിവരുടെ ട്വിറ്റര്‍ അക്കൗണ്ടുകളാണ് പൂട്ടിയതെന്നാണ് ആരോപണം.
അഞ്ചു നേതാക്കളുടെ അക്കൗണ്ട് പൂട്ടിയതായും അതില്‍ പ്രതിഷേധം രേഖപ്പെടുത്തുന്നുവെന്നും കോണ്‍ഗ്രസ് നേതാവ് പ്രണവ് ഝാ ട്വീറ്റ് ചെയ്തു. ട്വിറ്റര്‍ അക്കൗണ്ട് പൂട്ടിയിട്ടാല്‍ തങ്ങള്‍ ഇന്ത്യക്കുവേണ്ടി പോരാടുന്നതില്‍നിന്ന് പിന്തിരിയുമെന്ന് അവര്‍ കരുതുന്നുവെന്നും അദ്ദേഹം ട്വീറ്റ് ചെയ്തു. കേന്ദ്ര സര്‍ക്കാറിന്‍റെ സമ്മര്‍ദ്ദത്തിന് വഴങ്ങിയാണ് ട്വിറ്റര്‍ രാഹുലിന്‍റെ അക്കൗണ്ട് പൂട്ടിയതെന്നും കോണ്‍ഗ്രസ് ആരോപിച്ചു. ഇത് രാഷ്ട്രീയ പ്രേരിതമാണെന്നും അവർ ആരോപിച്ചു.
ഡല്‍ഹിയില്‍ കൂട്ടബലാത്സംഗത്തിന് ഇരയായി കൊല്ലപ്പെട്ട ബാലികയുടെ കുടുംബത്തിനൊപ്പം നില്‍ക്കുന്ന ചിത്രം പോസ്റ്റ് ചെയ്തതിനാണ് രാഹുലിന്‍റെ ട്വിറ്റര്‍ അക്കൗണ്ട് പൂട്ടിയത്. ട്വീറ്റ് നീക്കം ചെയ്തതായും ട്വിറ്റര്‍ ഡല്‍ഹി കോടതിയെ അറിയിച്ചിരുന്നു. നേരത്തേ പെണ്‍കുട്ടിയുടെ കുടുംബത്തിനൊപ്പമുള്ള ചിത്രം പങ്കുവെച്ചതിന് രാഹുല്‍ ഗാന്ധിക്കെതിരെ കേസെടുത്തിരുന്നു.
Post Your Comments