‘ഒന്നുംപറയണ്ട ചേച്ചീ സർജ്ജറിചെയ്തു കുളമാക്കി, പട്ടി കടിച്ചുപറിച്ചതു പോലെയാണ് വേദന സഹിക്കുന്നില്ല’-അനന്യയെ കുറിച്ച് സീമ

കൊച്ചി: ട്രാൻസ് ജെൻഡർ അനന്യയുടെ ആത്മഹത്യയിൽ വേദനയോടെ ട്രാൻസ് കമ്മ്യൂണിറ്റി. ലിംഗമാറ്റ സർജറിയിലെ അപാകതകൾ മൂലം ശാരീരികമായും മാനസികമായും വേദന അനുഭവിച്ചിരുന്ന അനന്യയെ ഓർമ്മിച്ചു സീമ വിനീതിന്റെ ഫേസ്‌ബുക്ക് പോസ്റ്റ് വൈറലാകുന്നു.

പോസ്റ്റിന്റെ പൂർണ്ണ രൂപം ഇങ്ങനെ,

‘ഈ ഭൂമിയിൽ എന്തൊക്കെയോ പ്രതീക്ഷകളും സ്വപ്നങ്ങളുമായി ജീവിതത്തിൽ പടപൊരുതി മുന്നോട്ടു പോയവൾ ഇപ്പോൾ പ്രതീക്ഷയറ്റ് ജീവനറ്റ മനുഷ്യ ശരീരമായി ആശുപത്രിയിലെ ഒരു മൂലയിൽ തന്റെ ഊഴവും കാത്തു കിടക്കുന്നു… ജീവിതത്തിൽ മറ്റാരേക്കാളും എന്നേക്കാളുമൊക്കെ എത്രയോ മുകളിൽ ആത്മവിശ്വാസം ഉള്ളവളായിരുന്നു…. എന്തെങ്കിലുo വിഷമഘട്ടങ്ങളിൽ ആദ്യം വിളിച്ചു തിരക്കും സീമേച്ചി എന്താ വിഷയം വിശദമായി അന്നെഷിക്കും കൂടാതെ ആത്മവിശ്വാസം പകർന്നു തന്നിട്ടാവും സംസാരം അവസാനിപ്പിക്കുന്നതും.

കുറച്ചു നാളുകൾക്കു മുൻപ് തിരുവനന്തപുരത്തു വന്നപ്പോൾ ചേച്ചീ ഫ്രീയാണോ കാണാൻ പറ്റുമോ എന്ന് ചോദിച്ചു… ഞാൻ പറഞ്ഞു വരാം ടാ വണ്ടിയുമെടുത്തു പോയി ഒരുപാട് ചുറ്റി ആസാദ് നിന്നും ഭക്ഷണം പാർസൽ വാങ്ങി വണ്ടിയിൽ ഇരുന്നു ഒരുമിച്ചു കഴി ച്ചു അതിനു ശേഷം F lounge ൽ കൊണ്ടുപോയി രണ്ടു ജോഡി ഡ്രസ്സ്‌ എടുത്തു എന്റെ കയ്യിൽ തന്നിട്ട് എന്നോട് പറഞ്ഞു സർജ്ജറി കഴിഞ്ഞിട്ട് ചേച്ചിക്ക് ഞാൻ ഒന്നും തന്നില്ലല്ലോ ഇത് എന്റെ വക ചേച്ചിക്ക്… എന്ന്.. പിന്നെ എന്നോട് ചേച്ചി ഒരു സന്തോഷ വാർത്ത ഉണ്ട് ഞാൻ സർജ്ജറിക്കു ഡേറ്റ് എടുത്തു, ചേച്ചി പ്രാർത്ഥിക്കണം എനിക്ക് ടെൻഷൻ ഉണ്ട് ചേച്ചി, ഞാൻ പറഞ്ഞു ഒന്നും ഇല്ല ടാ സന്തോഷമായി പോയിട്ട് വാ എന്നു പറഞ്ഞു യാത്രയാക്കി…….

അതിനു ശേഷം ഞാൻ അവളെ കാണുന്നത് renai medicity hospital വരാന്തയിൽ ആണ് ഞാൻ വോയിസ്‌ feminization surgery കഴിഞ്ഞു check up ചെയ്യാൻ പോയാ സമയം അവളും ദയഗായത്രിയും ഓടി വന്നു അടുത്തേക്ക് കെട്ടി പിടിച്ചു സംസാരിച്ചു എന്റെ സൗണ്ട് കേട്ട് അവൾ പറഞ്ഞു ചേച്ചിയെ ഈ സൗണ്ടിൽ സങ്കൽപ്പിക്കാൻ പറ്റുന്നില്ല ന്നു ചിലപ്പോൾ ചേച്ചിയുടെ ആ സൗണ്ട് കേട്ട് ശീലിച്ചത് കൊണ്ടാവും എന്നും…. ഞാൻ ചോദിച്ചു മോളെന്താ ഇവിടെ ..?
ഒന്നും പറയണ്ട ചേച്ചീ സർജ്ജറി ചെയ്തു കുളമാക്കി പട്ടി കടിച്ചു പറിച്ചതു പോലെയാണ് pain സഹിക്കുന്നില്ല ന്നൊക്കെ dr കാണാൻ വന്നതാണ് …..

ഒരു ചെറു വേദന പോലും സഹിക്കാൻ കഴിയാത്തവൾ ആണ് അവൾ ഇത്ര മാത്രം വേദന സഹിച്ചു സർജ്ജറി എന്ന കാര്യത്തിലേക്കു പോകാൻ അവളെ നയിച്ചത് മറ്റൊന്നുമല്ല കുട്ടിക്കാലം മുതൽ അവൾക്കുള്ളിലെ പൂർണ്ണത ആഗ്രഹിച്ച പെണ്ണ് എന്ന പൂർത്തീകരണത്തിന് വേണ്ടി മാത്രമാണ് അവൾ അവളുടെ ശരീരം കീറിമുറിക്കാൻ വിധേയയായത്.. തികച്ചും ഒരു പരാജയം ആയിരുന്നു അവളുടെ ജീവിതത്തിലെ ആ sexual reassignment surgery………….. ജീവിതത്തിൽ കുട്ടിക്കാലം മുതൽ അവൾ കണ്ട സ്വപ്നങ്ങൾക്ക് ഇന്ന് ഇതാ ഇവിടെ വിരാമം….

ഉള്ളിന്റെ ഉള്ളിൽ ഓരോ കുഴിമാടങ്ങൾ പണിയുന്നവരാണ് നാം കൈപ്പടിയിൽ നിന്നും വഴുതിപ്പോയ നമ്മുടെയൊക്കെ എത്ര എത്ര സ്വപ്‌നങ്ങൾക്ക് മുകളിലാണ് നമ്മുടെ നിസ്സഹായവസ്ഥ മനസ്സിലാക്കാതെ മനുഷ്യൻ എന്നുള്ള പരിഗണന പോലും തരാതെ മറ്റുള്ളവർ അവരുടെ ചീട്ടുകൊട്ടാരം പണിയുന്നത്……..
ഇന്ന് നീ നാളെ ഞാൻ…..
അനന്യ മോളെ വാക്കുകൾ പറഞ്ഞു നിന്നെ യാത്രയാക്കാൻ കഴിയുന്നില്ല എന്നും ഈ നെഞ്ചിനുള്ളിൽ ഉണ്ടാവും ഞാൻ മരിക്കുവോളം…
ആദരാഞ്ജലികൾ അനന്യ’