കൊച്ചി: മദ്യശാലകൾക്ക് മുന്നിലെ തിരക്കിൽ സർക്കാരിന് വീണ്ടും ഹൈക്കോടതിയുടെ രൂക്ഷ വിമർശനം. രാജ്യത്തെ കോവിഡ് രോഗികളില്‍ മൂന്നിലൊന്നും കേരളത്തിലാണെന്നും, കോടതിക്ക് സമീപത്തെ കടകളിൽ പോലും വലിയ തിരക്കാണെന്നും കോടതി ചൂണ്ടിക്കാട്ടി.
കോവിഡ് നിയന്ത്രണ പ്രകാരം കല്യാണത്തിന് 20 പേർ പങ്കെടുക്കുമ്പോൾ മദ്യശാലയ്ക്ക് മുന്നിൽ കൂട്ടയിടിയാണെന്നും മദ്യശാലകളിൽ 500 പേർ ക്യൂ നിൽക്കുകയാണെന്നും കോടതി വിമർശിച്ചു. മദ്യ വിൽപനയുടെ കുത്തകയുള്ള ബെവ്കോയ്ക്ക് ജനങ്ങൾക്ക് വേണ്ട സൗകര്യം ഒരുക്കാനുള്ള ബാധ്യതയുണ്ടെന്നും കോടതി വ്യക്തമാക്കി. മദ്യശാലയ്ക്ക് മുന്നിൽ കൂട്ടം കൂടുന്ന ആളുകളിലൂടെ രോഗം പകരാൻ സാധ്യതയില്ലേ എന്നും, ആളുകൾ കൂട്ടം കൂടുന്നത് എന്ത് സന്ദേശമാണ് സാധാരണക്കാർക്ക് നൽകുന്നതെന്നും ഹൈക്കോടതി ചോദിച്ചു.
മദ്യം വാങ്ങാൻ എത്തുന്നവരുടെ വ്യക്തിത്വം ബെവ്കോ പരിഗണിക്കണമെന്നും, ജനങ്ങളുടെ ആരോഗ്യമാണ് കോടതിക്ക് പ്രധാനമെന്നും കോടതി അറിയിച്ചു. മദ്യശാലകള്‍ക്ക് മുന്നിലെ തിരക്ക് ഒഴുവാക്കാൻ എത്രയും പെട്ടെന്ന് നടപടി വേണമെന്നും കോടതി ആവശ്യപ്പെട്ടു. ഇക്കാര്യത്തിൽ ചൊവ്വാഴ്ചയ്ക്കുള്ളിൽ സർക്കാർ മറുപടി നൽകണമെന്നും ഹൈക്കോടതി വ്യക്തമാക്കി.
Post Your Comments