ജയ്പൂര്‍: കോവിഡിന്റെ മൂന്നാംതരംഗം കൂടുതലും ബാധിക്കുക കുട്ടികളെയെന്ന റിപ്പോര്‍ട്ടുകള്‍ക്ക് പിന്നാലെ രാജസ്ഥാനില്‍നിന്ന് പുറത്തുവരുന്നത് ഞെട്ടിപ്പിക്കുന്ന കണക്കുകള്‍. ഇവിടെ 19 വയസില്‍ താഴെയുള്ള നിരവധി കുട്ടികൾക്കാണ് രോഗം സ്ഥിരീകരിച്ചിരിക്കുന്നത്. രാജസ്ഥാനിലെ രണ്ടു ജില്ലകളിലും കൂടി 600ലധികം കുട്ടികള്‍ക്കാണ് നിലവില്‍ രോഗം സ്ഥിരീകരിച്ചിരിക്കുന്നത്.
രാജസ്ഥാന്‍ ജില്ലയായ ദുന്‍ഗര്‍പുരില്‍ കുറച്ചു ദിവസത്തിനിടെ കോവിഡ് സ്ഥിരീകരിച്ചത് 325 കുട്ടികള്‍ക്ക്. ദൗസ ജില്ലയിലും സ്ഥിതി സമാനമാണെന്നാണ് വിവരം.രാജസ്ഥാനില്‍ കോവിഡിന് ശമനമാകാത്തതോടെ ലോക്ഡൗണ്‍ ജൂണ്‍ എട്ടുവരെ നീട്ടിയിരുന്നു. അതേസമയം ജൂണ്‍ ഒന്നുമുതല്‍ ചില ഇളവുകള്‍ അനുവദിക്കുകയും ചെയ്യും.കുത്തിവെപ്പില്ലാതെ മൂക്കിലൂടെ വാക്സിന് ഡോസ് സ്വീകരിക്കുന്ന ഇന്ത്യന്‍ നിര്‍മിത ‘നേസല്‍ കോവിഡ് വാക്സിന്’ കുട്ടികളിലെ കോവിഡ്ബാധയെ ചെറുത്ത് തോല്‍പിക്കുന്നതിന് ഏറെ സഹായകമാകുമെന്ന് ലോകാരോഗ്യ സംഘടനയിലെ മുഖ്യ ശാസ്ത്രജ്ഞയായ ഡോ. സൗമ്യ സ്വാമിനാഥന്‍ അറിയിച്ചിരുന്നു.
ശരീരത്തില്‍ അതിവേഗം പ്രവര്‍ത്തിച്ചു തുടങ്ങുന്ന സേല്‍ വാക്സിന് സാധാരണ വാക്സിനെക്കാള്‍ ഫലപ്രദമാണെന്നാണ് വിദഗ്ധ അഭിപ്രായം. ഉപയോഗിക്കാന്‍ എളുപ്പമെന്ന നിലയില്‍ ജനപ്രിയമാണ് മൂക്കിലൂടെ നല്‍കുന്ന വാക്സിനുകള്‍. ഒരു നാസല്‍ വാക്സിന് (ഓരോ മൂക്കിലും ഒരു തുള്ളി ആവശ്യമാണ്) സിറിഞ്ചുകള്‍ പോലുള്ള മെഡിക്കല്‍ ഉപകരണങ്ങള്‍ ലാഭിക്കാനും ഓരോ വാക്സിനേഷനും എടുക്കുന്ന സമയം കുറയ്ക്കാനും സഹായിക്കും.
സിംഗിള്‍-ഡോസ് മരുന്നാണെന്നതും പുതിയ വേരിയന്‍റിന് അനുകൂല ഘടകമാണ്. മൂക്കിലൂടെ ഒഴിക്കുന്ന കോവിഡ് വാക്സിന്‍റെ പരീക്ഷണങ്ങള്‍ക്ക് അനുമതിതേടി ഹൈദരാബാദ് ആസ്ഥാനമായുള്ള ഭാരത് ബയോടെക് ഡ്രഗ് കണ്‍ട്രോളര്‍ ജനറല്‍ ഓഫ് ഇന്ത്യയ്ക്ക് (ഡിസിജിഐ) അപേക്ഷ നല്‍കിയിരുന്നു.
Post Your Comments