പൊതുജനങ്ങളിലെ മാസ്ക് ധാരണം; നിർണ്ണായക കണ്ടെത്തലുകളുമായി ആരോഗ്യമന്ത്രാലയം

ഡൽഹി: രാജ്യത്ത്​ കോവിഡ് രണ്ടാം തരംഗത്തിന്റെ​ വ്യാപനം രൂക്ഷമായി തുടരു​​മ്പോഴും പൊതുജനങ്ങളിൽ 50 ശതമാനം പേർ മാസ്​ക്​ ധരിക്കുന്നില്ലെന്ന്​ പഠനം. മാസ്ക് ധരിക്കുന്ന 50 ശതമാനം പേരിൽ ശരിയായ രീതിയിൽ മാസ്​ക്​ ധരിക്കുന്നത്​ 14 ശതമാനം മാത്രമാണെന്നും പഠനത്തിൽ പറയുന്നു. കോവിഡുമായി ബന്ധപ്പെട്ട പഠനത്തിലെ കണ്ടെത്തലുകളിലാണ് ആരോഗ്യ മന്ത്രാലയം ഇക്കാര്യങ്ങൾ വ്യക്തമാക്കിയിരിക്കുന്നത്.

കോവിഡിനെ പ്രതിരോധിക്കാനുള്ള പ്രാഥമികമായ മാർഗ നിർദേശങ്ങൾ പോലും ഭൂരിഭാഗം പേരും ലംഘിക്കുകയാണെന്ന്​ കോവിഡ്​ അവലോകന യോഗത്തിന് ശേഷം​ ആരോഗ്യമന്ത്രാലയം നടത്തിയ വാർത്താസമ്മേളനത്തിൽ വ്യക്തമാക്കി. കണക്കുകൾ പ്രകാരം 100 പേരിൽ ഏഴുപേർ മാത്രമാണ്​ ശരിയായ രീതിയിൽ കൃത്യമായി മാക്​സ്​ ധരിക്കുന്നത്​. മറ്റുള്ളവർ താടിയും വായും മറച്ചുമാത്രമേ മാസ്​ക്​ ധരിക്കാറുള്ളൂ.

കോവിഡ് മാനദണ്ഡങ്ങൾ പാലിക്കുന്നതിൽ കാണിക്കുന്ന അലംഭാവമാണ് രാജ്യത്തെ വൈറസ് ബാധയ്ക്കുള്ള പ്രധാന കാരണം. സാമൂഹിക അകലം പാലിക്കാത്ത രോഗബാധിതനായ ഒരാൾക്ക് ഒരു മാസത്തിനുള്ളിൽ 406 പേർക്ക്​ രോഗം പകർന്നുനൽകാനാകും. 2000 പേരിൽ 25 ദിവസം നടത്തിയ പഠനത്തിൽനിന്നാണ്​ പുതിയ കണ്ടെത്തലുകൾ​ ഉണ്ടായത്. രോഗവ്യാപനം തടയാൻ ജനങ്ങൾ കൃത്യമായി കോവിഡ്​ മാനദണ്ഡങ്ങൾ പാലിക്കണമെന്നും ആരോഗ്യമന്ത്രാലയം അഭ്യർഥിച്ചു.