ഭുവനേശ്വർ : മാതാപിതാക്കളെയും 15 മാസം മാത്രം പ്രായമുള്ള തന്റെ പിഞ്ചു കുഞ്ഞിനെയും ഭാര്യ സ്ഥിരമായി മർദ്ദിക്കുന്നതോടെ വീടിനുള്ളിൽ സിസിടിവി ക്യാമറ സ്ഥാപിച്ച് ഭർത്താവ്. ഒഡീഷയിലെ പുരി ജില്ലയിലെ ഗോപ് ഗ്രാമത്തിലാണ് സംഭവം. ഇതോടെ യുവതി ഇവരെ ക്രൂരമായി മർദ്ദിക്കുന്ന ദൃശ്യങ്ങൾ സിസിടിവി ക്യാമറയിൽ പതിഞ്ഞിരിക്കുകയാണ്. കുട്ടിയെ യുവതി ക്രൂരമായി മർദ്ദിക്കുന്ന ദൃശ്യങ്ങൾ സോഷ്യൽമീഡിയയിൽ ഇയാൾ പങ്കുവെക്കുകയും ചെയ്തു.
ഒപ്പം യുവതിക്കെതിരെ ഇയാൾ പൊലീസിൽ പരാതി നൽകുകയും ചെയ്തു. ഇതോടെ ഇവരെ പൊലീസ് കസ്റ്റഡിയിലെടുത്തിരിക്കുകയാണ്. കേസ് അന്വേഷണത്തിന്‍റെ ഭാഗമായി സിസിടിവി ദൃശ്യങ്ങൾ പരിശോധിച്ചശേഷമാണ് യുവതിയെ പൊലീസ് പിടികൂടിയത്.
അതേസമയം ഭർത്താവിന്റെ ആരോപണങ്ങൾ യുവതി നിഷേധിച്ചു. പകരം ഭർത്താവും ബന്ധുക്കളും ചേർന്നു തന്നെ പീഡിപ്പിച്ചുവെന്ന് യുവതി ആരോപിച്ചു. തനിക്ക് കഴിക്കാൻ ഭക്ഷണം പോലും ഭർത്താവിന്റെ വീട്ടുകാർ നൽകാറില്ലെന്ന് യുവതി പറഞ്ഞു. ഭർത്താവിന്റെ വീട്ടിൽ ശാരീരികമായും മാസനികമായി പീഡനം നേരിട്ടുവരികയായിരുന്നു താനെന്ന് യുവതി പറഞ്ഞു. നിരന്തരം ആക്രമിക്കപ്പെട്ടതോടെയാണ് ദേഷ്യം തീർക്കാൻ താൻ കുട്ടിയെ മർദ്ദിച്ചതെന്നും ഇവർ പൊലീസിനോട് പറഞ്ഞു. ഇവരെ മജിസ്ട്രേറ്റിനുമുന്നിൽ ഹാജരാക്കി ജുഡീഷ്യൽ കസ്റ്റഡിയിൽവിട്ടു.
Post Your Comments