ഐപിഎല്‍ തീരുമാനമായി ; പൂര്‍ണമായും യുഎഇയില്‍, ഷെഡ്യൂള്‍ ഇങ്ങനെ

യുഎഇയില്‍ നടക്കാനിരിക്കുന്ന മാറ്റിവച്ച ഇന്ത്യന്‍ പ്രീമിയര്‍ ലീഗ് (ഐപിഎല്‍) സെപ്റ്റംബര്‍ 19 ന് ആരംഭിച്ച് നവംബര്‍ 8 വരെ നടക്കും. ഐപിഎല്‍ ചെയര്‍മാന്‍ ബ്രിജേഷ് പട്ടേല്‍ വെള്ളിയാഴ്ച ഷെഡ്യൂള്‍ സ്ഥിരീകരിച്ചു. 51 ദിവസമായിരിക്കും ടൂര്‍ണമെന്റ്. 2019 നെ അപേക്ഷിച്ച് കൂടുതല്‍ ഇരട്ട മത്സരങ്ങള്‍ ഉണ്ടാകില്ല. രാത്രി കളികള്‍ പോലെ ഉച്ചതിരിഞ്ഞ് മത്സരങ്ങള്‍ നടത്താന്‍ കഴിയാത്തതിനാല്‍ ഒരു ദിവസം രണ്ട് മത്സരങ്ങള്‍ നടത്തുന്നത് പ്രക്ഷേപകര്‍ക്ക് ഒരു പ്രശ്നമായിരുന്നു. ഇരട്ട മത്സരങ്ങള്‍ വാരാന്ത്യങ്ങളില്‍ മാത്രമേ ഷെഡ്യൂള്‍ ചെയ്തിട്ടുള്ളൂവെന്നും അത് ഈ വര്‍ഷവും പ്രതീക്ഷിക്കുന്നുവെന്നും ബ്രിജേഷ് പട്ടേല്‍ പറഞ്ഞു.

ഐപിഎല്ലിലെ ചൈനീസ് സ്‌പോണ്‍സര്‍ഷിപ്പുകളെ കുറിച്ച് തീരുമാനമെടുക്കേണ്ടതാണ് ബിസിസിഐയുടെ ഒരു പ്രധാന പ്രശ്‌നം. ജിസി യോഗത്തില്‍ തങ്ങള്‍ ഇക്കാര്യം ഏറ്റെടുക്കുമെന്ന് പട്ടേല്‍ പറഞ്ഞു. ചൈനീസ് സ്മാര്‍ട്ട് ഫോണ്‍ നിര്‍മ്മാതാക്കളായ ‘വിവോ’ ഐപിഎല്‍ ടൈറ്റില്‍ സ്‌പോണ്‍സര്‍മാരാണ്, അവരുടെ അഞ്ചുവര്‍ഷത്തെ കരാര്‍ 2,199 കോടി രൂപയാണ്. മറ്റ് രണ്ട് സ്‌പോണ്‍സര്‍മാരായ പേടിഎം, ഡ്രീം 11 എന്നിവയ്ക്കും ചൈനീസ് ഓഹരി ഉടമകളുണ്ടെന്ന് അദ്ദേഹം വ്യക്തമാക്കി.

2009 ലും 2014 ലും ടൂര്‍ണമെന്റ് വിദേശത്തേക്ക് പോയതുപോലെയുള്ള സ്റ്റേജിംഗ് ഫീസ് ബിസിസിഐക്ക് നല്‍കുമെന്നാണ് റിപ്പോര്‍ട്ട്. ഈ വര്‍ഷം ഒരു മത്സരത്തിന് ബിസിസിഐ ഫീസ് 30 ലക്ഷത്തില്‍ നിന്ന് 50 ലക്ഷമായി ഉയര്‍ത്തിയതിനാല്‍ പല ഫ്രാഞ്ചൈസികള്‍ക്കും അതൃപ്തിയുണ്ട്.

കാണികളില്ലാതെയാണ് ഐപിഎല്‍ കളിക്കുന്നതെങ്കില്‍ ഫ്രാഞ്ചൈസികള്‍ക്ക് വന്‍ വരുമാനനഷ്ടം നേരിടേണ്ടിവരും. കഴിഞ്ഞ പതിപ്പില്‍ എട്ട് ഫ്രാഞ്ചൈസികള്‍ 250 കോടി രൂപ ഗേറ്റ് മണി നേടിയിരുന്നു. കോവിഡ് സാഹചര്യം അനുവദിക്കുകയാണെങ്കില്‍ പരിമിതമായ ജനക്കൂട്ടത്തെയും ഹോസ്പിറ്റാലിറ്റി ബോക്‌സുകളെയും അനുവദിക്കുന്നത് ബിസിസിഐ നിരസിക്കുന്നില്ലെന്നും അത്തരത്തില്‍ യുഎഇ സര്‍ക്കാരിന്റെ ഉപദേശം തേടുമെന്നും പട്ടേല്‍ പറഞ്ഞു.