വന്‍ ദുരന്തത്തിന്റെ ഞെട്ടല്‍ മാറും മുമ്പ് വിശാഖപട്ടണത്ത് വീണ്ടും വാതകച്ചോര്‍ച്ച

വിശാഖ പട്ടണം: വിശാഖപട്ടണത്ത് അർദ്ധരാത്രിക്ക് ശേഷമുള്ള രണ്ടാമത്തെ ചോർച്ചയെക്കുറിച്ചുള്ള അഭ്യൂഹങ്ങൾ മൂലം പരിഭ്രാന്തരായ ജനങ്ങൾ കഴിച്ചു കൂട്ടിയത് ഹൈവേയിൽ. ഇതോടെ ദേശീയ പാതയിൽ വൻ ഗതാഗത കുരുക്കാണ്‌ ഉണ്ടായത്. നഗരത്തിലെ വിവിധ ആശുപത്രികളിൽ 11 പേർ മരിക്കുകയും 350 ൽ അധികം ആശുപത്രികളിൽ പ്രവേശിക്കുകയും ചെയ്ത ദിവസം, അർദ്ധരാത്രിക്ക് ശേഷം വീണ്ടും വിശാഖപട്ടണത്തെ പരിഭ്രാന്തരാക്കിയാണ് മെസേജുകൾ എത്തിയത്.

വ്യാഴാഴ്ച 11 പേരുടെ മരണത്തിലേക്ക് നയിച്ച അതേ പ്ലാന്റിലെ ടാങ്കിലാണ് വീണ്ടും വാതകച്ചോര്‍ച്ച അനുഭവപ്പെട്ടത്. തുടര്‍ന്ന് പ്ലാന്റിന്റെ അഞ്ചു കിലോമീറ്റര്‍ ചുറ്റളവിലുള്ള ഗ്രാമങ്ങള്‍ ഒഴിപ്പിച്ചതായി വിശാഖപട്ടണം ജില്ലാ ഫയര്‍ ഓഫീസറെ ഉദ്ധരിച്ച്‌ എ.എന്‍.ഐ റിപ്പോര്‍ട്ട് ചെയ്യുന്നു. പരിഭ്രാന്തരാകേണ്ട ആവശ്യമില്ലെന്ന് ആര്‍.കെ മീന പറഞ്ഞു. ആളുകളെയെല്ലാം പ്രത്യേക ബസുകളില്‍ അപകട മേഖലക്ക് പുറത്തുള്ള ബന്ധു വീടുകളില്‍ എത്തിച്ചിരിക്കുകയാണ്.

എൽജി പോളിമർസ് എന്ന കെമിക്കൽ പ്ലാന്റിന്റെ 5 കിലോമീറ്റർ ചുറ്റളവിൽ താമസക്കാരോട് മറ്റൊരു വാതക ചോർച്ച കാരണം എത്രയും വേഗം വീടൊഴിയാൻ പോലീസിന്റെ സന്ദേശങ്ങൾ എന്ന പേരിൽ സോഷ്യൽ മീഡിയയിൽ പ്രചാരണം ആരംഭിച്ചിരുന്നു. ഇതോടെ മാരിപാലം, മാധാവധാര, എൻ‌എഡി കോത്ത റോഡ്, മുരളി നഗർ തുടങ്ങിയ പ്രദേശങ്ങളിൽ നിന്നുള്ളവർ വീടുകളിലും കാറുകളിലും ഇരുചക്ര വാഹനങ്ങളിലും കാൽനടയായും വെളിയിലേക്ക് ഓടുകയും ദൂരെ പോയി ദേശീയ പാതകളിലും മറ്റും ഉറങ്ങാതെ ഇരിക്കുകയുമായിരുന്നു.

പിന്നീട് വിവരമറിഞ്ഞ കമ്മീഷണർ ജി സ്രിജന, ഡി.സി.പി. ഉദയ് ഭാസ്കർ നിയമസഭാംഗം പവൻ മാധവ് തുടങ്ങിയവർ വെളുപ്പിനെ ഒരു മണിക്ക് ജനങ്ങളോട് വീടുകളിൽ കഴിയാൻ ആവശ്യപ്പെടുകയായിരുന്നു. ഫാക്ടറി പൊട്ടിത്തെറിക്കുമെന്നും മറ്റൊരു ചോർച്ചയുണ്ടെന്നും ഉള്ള അഭ്യൂഹങ്ങൾ ഇപ്പോഴും പ്രചരിക്കുകയാണ്‌. ഇത് പ്ലാന്റിൽ നിന്ന് 4 മുതൽ 5 കിലോമീറ്റർ അകലെയുള്ള ആളുകൾക്ക് വീടുകളിൽ നിന്ന് പുറത്തുപോകാൻ കാരണമായി, ഇതോടെ ദേശീയപാതയിൽ പുലർച്ചെ ഒരു മണിക്ക് ഗതാഗതക്കുരുക്ക് സംഭവിച്ചു.

ഇതിനിടെ ആന്ധ്രാപ്രദേശിലെ വിഷവാതകചോര്‍ച്ച ദുരന്തത്തില്‍ ദേശീയ മനുഷ്യാവകാശ കമ്മീഷന്‍ കേസ്സെടുത്തു. സംഭവത്തില്‍ സംസ്ഥാനസര്‍ക്കാരിനും കേന്ദ്രസര്‍ക്കാരിനും കമ്മീഷന്‍ നോട്ടീസയച്ചു.നാല് ആഴ്ചക്കുള്ളില്‍ വിശദീകരണം നല്‍കണമെന്നാണ് കമ്മീഷന്‍ നിര്‍ദ്ദേശം.