ഈ മോഡൽ വാഹനത്തിന്റെ ഇന്ത്യയിലെ നിർമാണം റെനോൾട്ട് അവസാനിപ്പിച്ചെന്നു റിപ്പോർട്ട്

ഫ്രഞ്ച് വാഹനനിര്‍മ്മാതാക്കളായ റെനോ തങ്ങളുടെ എംപിവി മോഡൽ ലോഡ്‍ജിയുടെ ഇന്ത്യയിലെ നിർമാണം അവസാനിപ്പിച്ചു. റെനോ ഇന്ത്യ ഓപ്പറേഷന്‍സ് കണ്‍ട്രി സിഇഒ & മാനേജിംഗ് ഡയറക്റ്റര്‍ വെങ്കട്‌റാം മാമില്ലാപള്ളിയാണ് ഇക്കാര്യം അറിയിച്ചതെന്നാണ് പുറത്തുവരുന്ന റിപ്പോർട്ടുകളിൽ പറയുന്നത്.

വില്‍പ്പനയില്ലാത്തതാണ് ഈ തീരുമാനത്തിനു പിന്നിലെന്നാണ് സൂചന. 2019 നവംബറിൽ വെറും ആറ് യൂണിറ്റ് റെനോ ലോഡ്ജി മാത്രമാണ് ഇന്ത്യയില്‍ വിൽക്കാൻ സാധിച്ചത്. 2019 ഏപ്രില്‍-നവംബര്‍ കാലയളവില്‍ വെറും 315 യൂണിറ്റ് മാത്രമായിരുന്നു വിൽപ്പന. 2018ലെ ഇതേ കാലയളവില്‍ 652 യൂണിറ്റ് വില്‍ക്കാന്‍ കമ്പനിക്ക് സാധിച്ചിരുന്നു. വാഹനത്തിന്‍റെ പെട്രോള്‍ എന്‍ജിന്‍ ഓപ്ഷന്‍ ലഭ്യമാകാത്തതും കമ്പനിക്ക് തിരിച്ചടിയായി. ബിഎസ് 6 നിലവാരത്തിലേക്ക് പരിഷ്‌കരിക്കാതെ കെ9കെ ഡീസല്‍ എന്‍ജിന്‍ ഉപേക്ഷിക്കാനുള്ള റെനോയുടെ തീരുമാനം വാഹനത്തിന്‍റെ ഉല്‍പ്പാദനം അവസാനിപ്പിക്കുന്നതിലേക്ക് നയിക്കുകയായിരുന്നുവെന്നും റിപ്പോർട്ടുകളിൽ പറയുന്നു.

2015ലാണ് ലോഡ്‌ജിയെ റെനോൾട്ട് ഇന്ത്യൻ നിരത്തിലെത്തിച്ചത്. ഇക്കാലയളവിൽ വാഹനത്തില്‍ ചെറിയ പരിഷ്‌കാരങ്ങള്‍ വരുത്തിയിരുന്നുവെങ്കിലും അതൊന്നും വില്‍പ്പന കൂട്ടാൻ കമ്പനിയെ സഹായിച്ചില്ല