കുട്ടികളുണ്ടാകാൻ പ്രത്യേക പൂജ ചെയ്യാമെന്ന് പറഞ്ഞ് വീട്ടമ്മയെ പീഡിപ്പിച്ച ആൾദൈവം അറസ്റ്റിൽ

മുംബൈ: ഒരു വർഷത്തിലധികമായി വീട്ടമ്മയെ ഭീഷണിപ്പെടുത്തി പീഡിപ്പിച്ചു കൊണ്ടിരുന്ന ആൾദൈവം ബം​ഗാളി ബാബ അറസ്റ്റിൽ‌. മഹാരാഷ്ട്രയിലെ വിരാറിലാണ് സംഭവം. 37 വയസ്സുള്ള വീട്ടമ്മയാണ് കഴിഞ്ഞ ഒരു വർഷമായി ഇയാളുടെ പീഡനത്തിനിരയായത്. പീഡനത്തെ എതിർത്തപ്പോഴെല്ലാം കുടുംബത്തിൽ വലിയ അത്യാപത്ത് സംഭവിക്കുമെന്ന് ഇയാൾ ഭീഷണിപ്പെടുത്തിയിരുന്നതായും വീട്ടമ്മ വെളിപ്പെടുത്തുന്നു.
അജയ് ഹരിപദ് ചൗധരിയെന്ന ആളാണ് അറസ്റ്റിലായത്

പീഡനത്തിനിരയായ വീട്ടമ്മയ്ക്ക് വിവാഹം കഴിഞ്ഞ് വർഷങ്ങളായി കുട്ടികളില്ലായിരുന്നു. ഈ പ്രശ്നം പരിഹരിക്കുന്നതിന് വേണ്ടിയാണ് ഇവർ‌ ബാബയുടെ അടുത്തെത്തിയത്. കലിക മാതയ്ക്ക് അവരുടെ മേൽ വൻകോപം ഉണ്ടായതിനാലാണ് കുട്ടികളുണ്ടാകാത്തതെന്നും താന്ത്രിക വിധികൾ ചെയ്താൽ മാത്രമേ ഈ പ്രശ്നത്തിനൊരു പരിഹാരം ഉണ്ടാകൂ എന്നും ബാബ വീട്ടമ്മയെ ധരിപ്പിച്ചിരിക്കുകയായിരുന്നു. ഇക്കാര്യം പറഞ്ഞ് ഭീഷണിപ്പെടുത്തി കഴിഞ്ഞ മെയ് 27 മുതൽ ഈ വർഷം ഒക്ടോബർ വരെ ഇയാൾ വീട്ടമ്മയെ പീഡിപ്പിച്ചു.

ആരോടെങ്കിലും ഇക്കാര്യം പറഞ്ഞാൽ കലിക മാതാ അവരുടെയും കുടുംബത്തിന്റെയും മേൽ വൻദുരന്തം ഉണ്ടാക്കുമെന്നായിരുന്നു ബം​ഗാളി ബാബയുടെ ഭീഷണി. പീഡനം സഹിക്കാൻ സാധിക്കാതെ വന്നപ്പോഴാണ് ധൈര്യം സംഭരിച്ച് പൊലീസ് സ്റ്റേഷനിലെത്തി പരാതി നൽകിയതെന്ന് വീട്ടമ്മ പറഞ്ഞു.