ശബരിമല: യുവതികള്‍ പ്രവേശിച്ചാല്‍ നടയടച്ച് ശുദ്ധികലശം നടത്തുമെന്ന് മേല്‍ശാന്തി

സന്നിധാനം: ശബരിമല ക്ഷേത്രത്തില്‍ ആചാരം ലംഘിച്ച് യുവതികള്‍ പ്രവേശിച്ചാല്‍
നട അടച്ച് ശുദ്ധികലശം നടത്തുമെന്ന് മേല്‍ശാന്തി ഉണ്ണിക്കൃഷ്ണന്‍ നമ്പൂതിരി. ഐ.ജി അജിത്ത് കുമാറുമായി സന്നിധാനത്ത് നടത്തിയ കൂടിക്കാഴ്ചയിലാണ് അദ്ദേഹം ഇക്കാര്യം വ്യക്തമാക്കിയത്.

യുവതികള്‍ വീണ്ടുമെത്തിയാല്‍ ഈ പ്രക്രിയ ആവര്‍ത്തിക്കും.തിങ്കളാഴ്ച ഉച്ചയോടെ തന്ത്രി കണ്ഠര് രാജീവര് എത്തുമെന്നും അദ്ദേഹത്തിന്റെ നിര്‍ദ്ദേശ പ്രകാരം കാര്യങ്ങള്‍ നടപ്പാക്കുമെന്നും മേല്‍ശാന്തി പറഞ്ഞു.

ചിത്തിര ആട്ട വിശേഷത്തിന് തിങ്കളാഴ്ച വൈകിട്ട് അഞ്ചിനാണ് നടതുറക്കുന്നത്. വന്‍ പോലീസ് സുരക്ഷയാണ് ശബരിമലയിലുള്ളത്. അതേസമയം 50 വയസ്സിനു മുകളില്‍ പ്രായമുള്ള 15 വനിതാ പോലീസുകാരേയും സന്നിധാനത്ത് നിയോഗിച്ചിട്ടുണ്ട്.