ന്യൂഡല്‍ഹി: അധ്യാപികയെ വെടിവെച്ചു കൊലപ്പെടുത്തിയ കേസില്‍ ഭര്‍ത്താവും കാമുകിയും അറസ്റ്റില്‍ . ഇവരെ സഹായിച്ച യുവാവിനേയും പോലീസ് അറസ്റ്റ് ചെയ്തിട്ടുണ്ട്. ഭാവന സ്ട്രീറ്റില്‍ കഴിഞ്ഞ തിങ്കളാഴ്ചയാണ് കൊലപാതകം നടന്നത്. സുനിത എന്ന 38കാരിയെ ഭര്‍ത്താവും സുഹൃത്തുക്കളും ചേര്‍ന്ന് കൊലപ്പെടുത്തുകയായിരുന്നു. സംഭവത്തില്‍ ഭര്‍ത്താവ് മന്‍ജീത് (38), കാമുകി ഏഞ്ചല്‍ ഗുപ്ത (26) സഹായി രാജീവ് (40) എന്നിവരെയാണ് ഡല്‍ഹി പൊലീസ് അറസ്റ്റ് ചെയ്തത്.
മന്‍ജീത്തും ഏഞ്ചലും തമ്മില്‍ പ്രണയത്തിലായിരുന്നു. ഇരുവരും ഒരുമിച്ച് ജീവിക്കാന്‍ തീരുമാനിച്ചതോടെ ഇവരുടെ ബന്ധത്തെ സുനിത എതിര്‍ത്തതാണ് കൊലപാതകത്തിന് കാരണം. അതേസമയം സുനിതയെ ഇല്ലാതാക്കാന്‍ ഇരുവരും വാടകക്കൊലയാളിയെ ഏര്‍പ്പെടുത്തുകയായിരുന്നെന്ന് ഡി.സി.പി രജ്‌നീഷ് ഗുപ്ത പറഞ്ഞു. സ്‌കൂളിലേക്ക് പോകുന്നതുവഴി സുനിതയെ അജ്ഞാന്‍ വെടിവച്ച് കൊലപ്പെടുത്തുകയായിരുന്നു. വെടിയേറ്റ് വീണ സുനിതയെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അതേസമയം, വാടകകൊലയാളിയെ കണ്ടെത്തുന്നതിനുള്ള അന്വേഷണം പുരോഗമിക്കുകയാണെന്ന് ഡി.സി.പി വ്യക്തമാക്കി. 16 കാരിയായ മകള്‍ക്കും 8 വയസ്സുകാരനായ മകനുമൊപ്പമാണ് സുനിത താമസിച്ചിരുന്നത്.
Post Your Comments