വായ്​പക്കാര്‍ പുറകേ നടക്കുന്ന കഷ്​ടകാലം അംബാനിക്കും വരും

ന്യൂഡൽഹി: ധീരുഭായ്​ അംബാനിയുടെ ഇളയ പുത്രന്‍ അനില്‍ അംബാനിയാണ്​ പുതിയ വാര്‍ത്തകളിലെ നായകന്‍. അച്ഛ​​ന്റെ മരണശേഷം ജേഷ്​ഠന്‍ മുകേഷ്​ അംബാനിയുമായി വഴിപിരിഞ്ഞ്​ അനില്‍ അംബാനി സ്വന്തമാക്കി നയിച്ചിരുന്ന റിലയന്‍സ്​കമ്യൂണിക്കേഷന്‍ (ആര്‍.കോം) പാപ്പരത്വ നടപടിക​ളിലേക്കാണ്​ കഴിഞ്ഞയാഴ്​ച നീങ്ങിയത്​.

ആര്‍കോമില്‍നിന്ന്​ കിട്ടാനുള്ള 1150 കോടി രൂപ ലഭിക്കാന്‍ സാധ്യതകളൊന്നുമില്ലെന്നും​ പണം ഇൗടാക്കാന്‍ നടപടി സ്വീകരിക്കണമെന്നുമാവശ്യപ്പെട്ട്​ സ്വീഡിഷ്​ ടെലികോം കമ്പനിയായ എറിക്​സണ്‍ നല്‍കിയ മൂന്നു ഹർജികളാണ്​ നാഷനല്‍ കമ്പനി ലോ ട്രിബ്യൂണല്‍ (എന്‍.സി.ല്‍.ടി) സ്വീകരിച്ചിരിക്കുന്നത്​. പണ്ടേ പ്രതിസന്ധിയിലായ കമ്പനിയുടെ ടവറുകളും കേബിളുകളും സ്​പെക്​ട്രവുമുള്‍പ്പെടെ ​സഹോദര​​ന്റെ റിലയന്‍സ്​ ജിയോക്ക്​​ വിറ്റ്​ 18,000 കോടി സമാഹരിക്കാനുള്ള പരിശ്രമത്തിനും കൂടിയാണ്​ ഇതോടെ തിരിച്ചടിയായത്​.

ALSO READ:മുകേഷ് അംബാനിയുടെ മകൾക്ക് പ്രമുഖ വ്യവസായിയുടെ മകൻ വരൻ 

ഇതോടെ പണത്തിനായി വായ്​പക്കാര്‍ പുറകേ നടക്കേണ്ടി വരുന്ന അവസ്ഥയിലാണ് അനിൽ അംബാനി. ഒന്നും രണ്ടുമല്ല 2017മാര്‍ച്ചിലെ കണക്കനുസരിച്ച്‌​ 45,753 കോടി രൂപയോളമാണ്​ റിലയന്‍സ്​ കമ്യൂണിക്കേഷന്‍ നല്‍കാനുള്ളത്​. നഷ്​ടത്തില്‍നിന്ന്​ ന​ഷ്​ടത്തിലേക്ക്​ നീങ്ങിയിരുന്ന കമ്പനി കഴിഞ്ഞ വര്‍ഷം നവംബറില്‍ ടുജി, 3ജി സേവനങ്ങള്‍ അവസാനിപ്പിച്ചിരുന്നു.

ട്രൈബ്യൂണല്‍ നടപടികള്‍ തുടങ്ങിയാല്‍ ആസ്​തികള്‍ വിറ്റ്​ കടമൊഴിവാക്കാന്‍ പോലും സാധിക്കില്ലെന്നതുകൊണ്ട്​ എറിക്​സണുമായി കോടതിക്ക്​ പുറത്ത്​ ഒത്തുതീര്‍പ്പിന്​ അവസാനവട്ട ശ്രമങ്ങള്‍ നടക്കുന്നുണ്ടെങ്കിലും എളുപ്പമല്ലെന്നാണ്​ റിപ്പോര്‍ട്ടുകള്‍.