തോക്കും വാളും മാരകായുധങ്ങളുമായി ഐഎസ് ഭീകരര്‍ ഷോപ്പിങ് മാളില്‍. പിന്നീട് നടന്ന കാര്യങ്ങള്‍ ഇപ്പോഴും വിശ്വസിക്കാനാകാതെ നില്‍ക്കുകയാണ് ദൃക്‌സാക്ഷികള്‍. തോക്കും വാളുമൊക്കെയായി ഭീകരര്‍ ഷോപ്പിങ് മാളിലെത്തിയപ്പോള്‍ പലരും പരിഭ്രാന്തരായി ഓടി. ‘അല്ലാഹു അക്ബര്‍’ എന്ന് ഉറക്കെ ഉച്ചരിച്ചായിരുന്നു ഇവരെത്തിയത്. ഇറാനിലെ കൗറിഷ് ഷോപ്പിങ് മാളിലാണ് സംഭവം നടന്നത്.
വാസ്തവത്തില്‍ ദമാസ്‌കസ് ടൈം സ്‌കെയേര്‍ഡ് എന്ന ഇറാനിയന്‍ ചിത്രത്തിലെ കഥാപാത്രങ്ങളാണ് മേക്കപ്പഴിക്കാതെ ഷോപ്പിങ് മാളിലെത്തിയത്. ഇസ്ലാമിക് സ്റ്റേറ്റ് തട്ടിക്കൊണ്ടുപോകുന്ന അച്ഛന്റെയും മകന്റെയും കഥപറയുന്ന ചിത്രമാണിത്. പ്രോമോഷന്റെ ഭാഗമായിരുന്ന പ്രകടനം.
സംഭവത്തിനെതിരെ മാളിലുള്ളവര്‍ ശക്തമായ വിമര്‍ശനവുമായി എത്തി. കുട്ടികള്‍ക്കും സ്ത്രീകള്‍ക്കും എന്തെങ്കിലും സംഭവിച്ചിരുന്നെങ്കില്‍ എന്തു ചെയ്യുമെന്നായിരുന്നു അവരുടെ ചോദ്യം. ഏറ്റവും മോശമായ സിനിമാ പ്രചരണം എന്ന് ചിലര്‍ ട്വിറ്ററില്‍ കുറിച്ചു. സോഷ്യല്‍ മീഡിയയിലും പ്രതിഷേധം ശക്തമായതോടെ ചിത്രത്തിന്റെ സംവിധായകന്‍ ക്ഷമാപണം നടത്തേണ്ടി വന്നു.
Post Your Comments