ന്യൂഡല്‍ഹി: മൂന്നാം എന്‍ഡിഎ സര്‍ക്കാര്‍ അധികാരമേറ്റതിന് പിന്നാലെ പ്രധാനമന്ത്രിക്ക് ആശംസകളറിയിച്ച് ഇന്ത്യന്‍ സിനിമാ ലോകം. സമൂഹമാദ്ധ്യമങ്ങളിലൂടെയാണ് താരങ്ങള്‍ ആശംസകള്‍ അറിയിച്ചത്. സിദ്ധാര്‍ത്ഥ് മല്‍ഹോത്ര, വരുണ്‍ ധവാന്‍, ചിരഞ്ജീവി, റിഷഭ് ഷെട്ടി, രാജ്കുമാര്‍ റാവു എന്നിവര്‍ പ്രധാനമന്ത്രിയ്ക്ക് ആശംസകള്‍ അറിയിച്ചു.
Read Also: സഹമന്ത്രി പദവി ഏറ്റെടുക്കുന്നതിലെ ബുദ്ധിമുട്ട് ബിജെപി കേന്ദ്ര നേതാക്കളെ അറിയിച്ച് സുരേഷ് ഗോപി
പ്രധാനമന്ത്രി രാജ്യത്തെ കൂടുതല്‍ ഉയരങ്ങളിലേക്ക് നയിക്കട്ടെയെന്ന് വരുണ്‍ ധവാന്‍ ഇന്‍സ്റ്റഗ്രാമില്‍ കുറിച്ചു. പ്രധാനമന്ത്രിയുടെ ചരിത്രപരമായ മൂന്നാം ടേമിന് ആശംസകളെന്ന് സിദ്ധാര്‍ത്ഥ് മല്‍ഹോത്രയും ആശംസകള്‍ അറിയിച്ചു. പ്രധാനമന്ത്രിയുടെ ചിത്രം പങ്കുവച്ചുകൊണ്ട് രാജ്കുമാര്‍ റാവുവും ആശംസാ കുറിപ്പ് പങ്കുവച്ചു. നിങ്ങളുടെ മാതൃകാപരമായ നേതൃത്വത്തിന് കീഴില്‍ രാജ്യം ഇനിയും വളരട്ടെയെന്ന് രാജ്കുമാര്‍ റാവു ഇന്‍സ്റ്റഗ്രാമില്‍ കുറിച്ചു.
വികസനം, വിദ്യാഭ്യാസം, രാജ്യസുരക്ഷ എന്നിവയോടുള്ള അങ്ങയുടെ സമര്‍പ്പണത്തെ പ്രശംസിക്കുന്നുവെന്നാണ് റിഷഭ് ഷെട്ടി അഭിനന്ദിച്ചത്. മൂന്നാം തവണയും ഇന്ത്യയുടെ പ്രധാനമന്ത്രിയായി അധികാരമേറ്റ നരേന്ദ്രമോദിക്ക് അഭിനന്ദനങ്ങളെന്ന് ചിരഞ്ജീവി ഇന്‍സ്റ്റഗ്രാമില്‍ കുറിച്ചു. മന്ത്രിസഭയിലെ എല്ലാ മന്ത്രിമാര്‍ക്കും ആശംസകള്‍ നേരുന്നുവെന്നും രാജ്യത്തെ സമൃദ്ധിയുടെ പാതയിലൂടെ മുന്നോട്ട് നയിക്കാന്‍ സാധിക്കട്ടെ എന്നും അദ്ദേഹം കൂട്ടിച്ചേര്‍ത്തു.
രാഷ്ട്രപതി ഭവനില്‍ നടന്ന ചടങ്ങില്‍ ബോളിവുഡ് താരങ്ങളായ ഷാരുഖ് ഖാന്‍, അക്ഷയ് കുമാര്‍ എന്നിവര്‍ പങ്കെടുത്തിരുന്നു. താരങ്ങളെ കൂടാതെ മന്ത്രിമാര്‍, പ്രമുഖ സംരംഭകര്‍ എന്നിവരുള്‍പ്പെടെ വിവിധ മേഖലകളില്‍ നിന്നുള്ളവര്‍ ചടങ്ങിന്റെ ഭാഗമായി.
Post Your Comments