സുനില്‍ ഗവസ്‌കറിന് ശേഷം ടെസ്റ്റിലെ ഈ റെക്കോര്‍ഡ് പിന്നിട്ടത് കോഹ്ലി മാത്രം, ദ്രാവിഡിന് പോലും സാധിച്ചില്ല

ന്യൂഡല്‍ഹി: സുനില്‍ ഗവസ്‌കറിന് ശേഷം ഐസിസി ടെസ്റ്റ് റാങ്കിംഗില്‍ 900 പോയിന്റ് പിന്നിടുന്ന താരം എന്ന ബഹുമതി ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്ലിക്ക് സ്വന്തം. ഈ നേട്ടം പിന്നിടുന്ന രണ്ടാം ഇന്ത്യന്‍ താരവും 31-ാമത് അന്താരാഷ്ട്ര താരവുമാണ് കോഹ്ലി.

കരിയറിലെ 50-ാം ടെസ്റ്റിലായിരുന്നു ഗവസ്‌കര്‍ 900 പോയിന്റ് പിന്നിട്ടത്. സെഞ്ചൂറിയന്‍ ടെസ്റ്റിലെ സെഞ്ചുറിയോടെയാണ് കോഹ്ലി ഈ നേട്ടത്തില്‍ എത്തിയത്. കോഹ്ലിയുടെ കരിയറിലെ 65-ാം ടെസ്റ്റായിരുന്നു അത്.

നേരത്തെ സച്ചിന്‍ ടെണ്ടുല്‍ക്കറും രാഹുല്‍ ദ്രാവിഡും 900 പോയിന്റ് എന്ന നേട്ടത്തിന് അരികില്‍ എത്തിയിരുന്നു. 2002ല്‍ സച്ചിന്‍ 898 പോയിന്റും 2005ല്‍ ദ്രാവിഡ് 892 പോയിന്റും നേടിയിരുന്നു. 961 പോയിന്റുള്ള ഡോണ്‍ ബ്രാഡ്മാനാണ് പട്ടികയില്‍ ഒന്നാമന്‍.