മൊബൈൽ കണക്ഷൻ ലഭിക്കാൻ പുതിയ നിബന്ധനകൾ

മനാമ: മൊബൈൽ കണക്ഷൻ ലഭിക്കാനായി ബഹ്‌റൈനിൽ ഇനി മുതൽ വിരലടയാളം കൂടി രേഖപ്പെടുത്തണം. മറ്റുള്ള രേഖകൾക്ക്​ പുറമെയാണ്​ വിരലടയാളം രേഖപ്പെടുത്തേണ്ടത്. പ്രീ പെയ്​ഡ്, പോസ്​റ്റ്​ പെയ്​ഡ്​ കണക്ഷനുകൾക്ക് ഇത് ബാധകമാണെന്ന് ടെലികോം റെഗുലേറ്ററി അതോറിറ്റി (ട്രാ) അധികൃതർ അറിയിച്ചു. ഇനിമുതൽ ഒരു ഐ.ഡി ഉപയോഗിച്ച് എടുക്കാവുന്ന പ്രീപെയ്‌ഡ്‌ കണക്ഷനുകളുടെ എണ്ണം 10 ആയി പരിമിതപ്പെടുത്തിയിട്ടുണ്ട്.

പുതിയ നിർദേശം നിലവിൽ വരുന്നതോടെ വ്യാജ രേഖകൾ സമർപ്പിച്ച്​ പോസ്​റ്റ്​ പെയ്​ഡ്​ കണക്​ഷനും ഉപകരണങ്ങളും വാങ്ങി തട്ടിപ്പ്​ നടത്തുന്ന പ്രവണത അവസാനിപ്പിക്കാനാകുമെന്നാണ് അധികൃതർ പ്രതീക്ഷിക്കുന്നത്. മൊബൈൽ സേവനദാതാക്കൾ വിരലടയാളം അടക്കമുള്ള രേഖകള്‍ ഉപഭോക്താക്കളില്‍ നിന്ന് ശേഖരിക്കുന്നതിനാവശ്യമായ സംവിധാനമുണ്ടാക്കണമെന്നും കൂടാതെ ബോധവൽക്കരണം കൂടുതൽ ശക്തമാക്കണമെന്നും ‘ട്രാ’ നിർദേശിച്ചിട്ടുണ്ട്.